Boxing Federation of India(BFI) Secretary General Himanta Kalita hova BFI hruaitu dangte leh Mizoram District hrang hranga Boxing Association hruaitute vawiin chawhma dar 11 a ZOOM Meeting neih chuan June ni 27, 2023 khian Mizoram Boxing Association (MIZBA) hruaitu thlanna neih leh nise an ti.
Mizoram Boxing Association (MIZBA) hi an chhungkua ah inremlohna neuh neuh an neih avangin kum 2 chhung mumal takin an kal thei lo tawh a. June ni 9 khan BFI ruahmanna hnuaiah Hawla Indoor Stadium, Aizawl ah Election hi neih a ni ta a, President ah Dr.Lalrozama IAS, Secretary General ah Robert Lalnunmawia leh Treasurer ah Lalremkima, Aizawl vek te thlan tlin an ni. Mahse hemi tum hian BFI Observer an tel lo tih chhuanlama hmangin, hemi ni vek hian MIZBA hruaitu thar te an pawm theih loh thu leh inthlan that a ngaih tur thu BFI hian ziakin MIZBA a rawn hriattir a. Chumi kalzelah chuan vawiin chawhma dar 11 khan MIZBA hruaitu thlan thar te leh District hrang hranga Boxing Association hruaitu aiawh te chuan ZOOM Meeting hmangin an sawiho a, BFI lam nawrna avangin inthlan that leh an titlu ta a ni.
