Vawiin khan Mizoram Police chuan thuchhuah siamin, “Tun hnai mai khan Social Media hrang hrangah, Mizo thalai ramdang a housemaid hna thawkten harsatna an tawh chungchang tarlan a ni a. Mizo hmeichhia housemaid pathum E&K Agency, Vaivakawn ten ni 6.11.2022 a Syria a a thawn thlak ten harsatna an tawh chungchang a Mizoram Sawrkar hmala tawk lo anga Social media a tarlan hi thu belhchian dawl lo a ni,” tiin an tarlang a.
Heng Mizo hmeichhe pathum harsatna tawk te chungchanga Mizoram Police in hma a lak tawhna chu a hnuaia mi ang hi a ni tiin a hnuai a mi ang hian sawifiahna an siam :
i) Ni 01.05.2024-a Mizoram Police Press Release a tarlan tawh angin, Syria rama Mizo Nula hnathawkten harsatna an tawh avanga chhanchhuah tur a nih thu tarlan a nih angin First Secretary, Head of Chancery, Indian Embassy, Damascus, Syria chu biak pawh nghal a ni a. Official e-mail leh telephone hmanga inbiak pawh reng niin chanchin update pawh inhriattir tawn zel a ni bawk.
ii) Tin, Syria-a Mizo housemaid-te nen pawh inbiak pawh tawn reng niin, harsatna an tawh dan te zawh fiah an ni a, Sawrkar anga hmalak mek a nih thu pawh hriattir an ni. Syria-a Indian Embassy chuan Ministry of Foreign Affairs (MoFA) Syria-te nen dt. 19.5.2024 khan meeting an neih thu leh Mizo housemaid chhawrtute pawh Legal Notice pek an nih tawh thu an rawn sawi a.
iii) A tirah Syrian Agency ten Mizo housemaid te rang taka an haw theih nan $2,500 theuh chawi tura an tih laiin, Indian Embassy leh Syrian Sorkar thuneitute hmalakna avangin Placement Agency te hian pawisa chawi ngai lovin Mizo housemaid te thawhna hmuna thawk turin an aiawh tur an zawn sak dawn a ni.
iv) Indian Embassy atanga thudawn danin Dubai-a Placement agency leh Syria-a Placement Agencies te pawhin Mizo housemaid-te thlaktu tur (replacement) an buaipui mek a, Syria ram dan anga thil tih tul ang te tih fel a nih hnuah Exit Visa pek an nih tur thu an sawi bawk.
v) Syria ram hi rambuai tak a nih avangin official-a thil bawhzui a harsa hle a; Chutih rualin, Mizo housemaid-te an lo haw theih nan a tih tur tul ang ang te tih zawh thuak tawh a ni.
Mizoram khua leh tui, ram danga hnathawkte harsatna tawh chungchang hi Mizoram Chief Minister leh Home Minister-ten an ngai thu takin heng case te hi uluk taka vil reng a ni. Dubai a harsatna tawk NI. Lalkhumtiri pawh Chief Minister leh Home Minister te kaihhruaina in ni 09.05.2024 khan him takin Mizoramah hruai haw a lo ni tawh a. Mizoram Sorkar chuan uluk takin he thil hi a chhui zui in a ngaihven zui zel dawn a. Heng Mizo hmeichhia harsatna tawk te hi a rang thei ang bera Mizoram a hruai haw an nih theih nan hma a la zel dawn a ni.
