Vawiin khan Mizo Inneih, Inthen leh Rokhawmna Dan (The Mizo Marriage, Divorce and Inheritance of Property Act, 2014) ennawntu Review Committee chu an Chairman Pu Zahmingthanga Ralte, Additional Secretary, Law and Judicial Department hovin Secretariat Conference Hall, MINECO-ah an thukhawm.
Chairman Pu Zahmingthanga Ralte chuan committee memberte chu an mawhphurhna an tihhlawtlin avangin lawmthu a hrilh a, he Dan siamthatna tura ngaihtuahna sengtu leh rawtna thehluttute hnenah lawmthu a sawi bawk a. He Dan hnuaiah hian Mizo hmeichhiate’n ro an khawm theihna tur leh nupa inthenna a thlen chang a hmeichhiate chanvo tur te tarlan a ni a, hei hi Mizo hnam tan thil chhinchhiah tlak tak a nih thu a sawi. Tun hnaiah a mipa zawk Mizo ni hauh lo te leh Mizo hmeichhiate he Dan hnuaia inneihtir engemawzat an awm tih sawrkar chhinchhiahna atangin a lan thu a sawi a, hetiang Inneihna hi Dan mit atanga inneihna tiling lo a nih avangin Inneihtirtu (License Holders) zawng zawngte fimkhur leh zual turin a chah a. He Dan hnuaia Inneihna Licence kawl zawng zawngte leh Kohhran hrang hrang ami te chu he Mizo Inneih, Inthen leh Rokhawmna Dan, 2014 hi chiang taka chhiar thin turin a chah bawk a ni.
Review Committee hian rawtna engemawzat a siam a, a tlangpuiin Dan dinglaia thil fel tawk lo siamthatna tur a ni hlawm a. A Dan hming hi a sei deuh avang leh hetiang lam Dan dangte hming enkual a nih hnuah he Dan hming thar atan ‘The Mizo Marriage and Inheritance of Property Act’ (Mizo Inneih leh Rokhawmna Dan) tih mai ni se tiin rawtna siam a ni a. Heng rawtna hrang hrang te hi Sawrkarin a pawm chuan Assembly Session-ah Dan dinglai siam tha tur a Bill put luh a ni ang.
Vawiin thutkhawm hi Review Committee thutkhawm vawi thumna niin, Central YMA, MHIP Headquarters, MUP Headquarters aiawhte leh Mizoram BAR Association aiawhte bakah helama mi thiam bikte an tel a ni.
