Vawiin ni 10 September, 2024 (Thawhlehni) chhawhma dar 11 khan, MZP General Headquarters Executive Committee Meeting vawi 635-na chu MZP Conference Hall-ah neih a ni a. Mizoram University(MZU) hnuaia hnalak leh buaina hrang hrang chungchang, hnamdang(vai) in a Mizoram chhunga Mizo kut an thlak chungchang bakah, pawl chhung thil hrang hrangte rel a ni. Meeting hi Pu H. Lalthianghlima, President-in a kaihruai a ni.
Meeting chuan, ni 7 September, 2024 (Inrinni) a Sairang rel kawng siamna hmuna hnamdang (vai)-in, mawilo taka Mizo kut an lo thlak chu hriatthiam har a ti hle a. MZP hruaiten a hmunah ngei a enfiah hnuah leh, a zirchian hnuah Meeting chuan Mizo kutthlaktu vai chhawrtu company ten Mizo mipuite hmaah ngaihdam an dil ngei tur a ni a ti. MZP chuan Hnamdang ten Mizoram chhungah ngei Mizote kut an thlak ta fo mai hian, Mizote kan ramchhungah kan him tawk tawh loh zia lantirtuah a ngai nghet tlat a ni.
Meeting chuan, hetiang thil thlengah hian Mizo Police te pawhin an Service ringawt ngaihtuah lo a, ram leh hnam rilru pu chunga Mizoram leh hnam tan thawk turin a ngen nghal bawk.
Meeting chuan, tun hnaia MZU hnuaia zirtirtu hrang hrang hnalak mek leh MZU chhunga thawktu inluling leh zirlaite hmusit taka khawsa an awm nia a hriat chungchâng a ngaihtuah a. A ram leilung fa ngei tling leh tlak an awm anih chuan duhsak turin MZU hotute a ngen nawn leh a. Hnam dang duhsak bikna leh Mizo fa ngeite hnawl tumna a awm a nih chuan na takin hmalak nise tih a ni.
MZU hnathawktu zingah, Mizo te hmusit leh diriam taka tawngkam nei leh Zirlaite vau ching an awm niin a hre bawk a. Qualified tawk lo zirtirtu awm nia sawi awm pawh chhuichiana a tul anga hmalak nise a ti bawk.
