Vawiin ni 3, March 2025 hian Mizo National Front chuan Mizo National Day champha vawi 58-na, 1, March 2025 chu Mizo Hnam Runah urhsun taka hmangin, Zalenna suala Martarte sunna hun ngawirengin minute khat dingin hman a ni bawk.
He hunah hian Pu Zoramthanga, President, MNF chuan thusawiin, MNF ten Zalenna puang a, India kan kah chhan chu, ‘ni 26 November 1949-a India siamna Constitution of India Preamble-ah Mizo te kan tel ve loh avang leh Excluded area kan nih avanga, India a kan telvena tur chuan kan ai awh ten kan ngaihdan leh duhdan sawive duh kan nei’, ti-a ni 30, October 1965-a Pu Laldenga leh India President Lal Bahadur Shastri, khatih laia Assam CM Chaliha telna ngeia Guahaty-a sawihona bawhzui kawngah kawng dang min hawisan a, Sipai tha chakna hmanga hnehchhuh leh awp beh luih min tumna chhanna atan loh theih lohin kan ram leh kan hnam humhim nan India chu kap ta kan ni, a ti. Prime Minister, Jawahar Lal Nehru-a pawhin Excluded Area kan nih avanga tu ta mah kan nih loh thu leh British in min enkawl laia min enkawl anga enkawl kan nih ve tur thu a sawi a ni, a ti bawk.
Buaina karah vawi tam inbiakna awmin, 1986 ah remna sual chhuah alo ni ta a, he remna thuthlung duan anih lai pawha kan tanfung lian ber chu ‘India siamna a kan tel ve loh thu’ hi la ni fanin, India chuan UT kan nih mekna State a hlankai leh abika enkawlna leh venhimna pek min tiam a, thubuai awm mek zawng zawng nuairal a ni bawk ang. Keini lamin kan ralthuam neih zawng zawng hlan a, midang kan puih thin te tihtawp a, MNF in Dan kan hman mek pawh dahthat kan remti a. Chu inremna in a hrinchhuah chu Constitution of India Art. 371G, enkawl bik kan nihna tur leh kan ram, kan hnam leh kan sakhua humhim tlat a nihna tur hi alo piang ta a ni. State dang ten an neih ve te hi chu khawngaih thilpek a ni a, Hnam Pasaltha thisen leh nunna tam tak inpekna avanga Zalenna famkim la nei rih lo mah ila, vawiin kan dinhmun hi min chhuh dawn a nih chuan kan pek ve kha India hian min pek let a ngai dawn a ni, a ti bawk.
MNF President chuan, Pathian leh kan Ram tan ral kan do a, kan bei zel a, Art.371G kan nei ta a, Mizoram sawrkar kutah kan sakhaw humhimna pawh awm ta in, kan Lalpa leh a Ram tan kan ram chu buatsaih turin Lalpan min hruai lut ta a ni. Hnamtin hnena a chanchintha hril a, amah ringtua siam turin Lalpa’n Zoram min buatsaih a. Political Party dang 35 chuang zet an ral tawh laiin kan thuthlung ‘Pathian leh kan Ram tan’ tih kan vawn tlat avangin, vawiin thlengin kum 64 chhung humhim kan ni a, Zoram a Party lian ber zingah min la din tir reng a ni, a ti bawk.
Pu Zoramthanga chuan, Mizo National Day kan hman hian MNF te chu kan lungphum vuan tlat a, nghet taka ding turin min hrilh thar leh se, chu thuthlung nghet taka kan vawn tlatna chu thuthlung neitu kan Pathianin kan felna ah a ruat chho zel ang, tiin kalkhawmte a chah bawk a ni.
Mizo National Day champha hmanna hun hi Dr. R. Lalthangliana, Sr. Vice President, MNF in a kaihruai a, Rev. Lalzuithanga, Ex-Moderator, Mizoram Synod chuan hunserh a hmang a, MNF innghahna Bible chang Sam 20:7 chu sawirual a ni bawk. MNF ticket-a Village Council leh Local Council Member thlantharte hmelhriattirna hun hman a ni a, Lalrindiki Khiangte (Diki, Khawbel) chuan zaiin kalkhawmte thiam takin a sawi bawk.
