Vawiin khan Govt.Bethlehem Vengthlang High School chuan HSLC pass thar-te lawmpuina hun school campus-ah an hmang a, he huna khuallian bialtu MLA Pu C.Lalsawivunga chuan, a bial chhunga Bethlehem Vengthlang High School chu Aizawl District huam chhunga zirlai pass percentage sang ber an ni leh, zirlaite pawh division tha tak tak neia an pass chu lawmawm a tih thu sawiin, pass tharte leh an chhûngte duhsakna a hlan a; zirtirtute inpêkna sânzia a hriatin zirtirtute chungah lawmthu a sawi bawk.
Pu C.Lalsawivunga chuan, Mizo thalai All India Services an tlem tawh chu manganthlâk a tih thu sawiin, a bial chhûnga All India Services-a inziak tling thei an awm a nih chuan an senso zawng zawng pêklet a lo intiam tawh chu he hunah hian sawi nawn lehin, a thu tiam chu a la pangngai reng thu a sawi. Pu C.Lalsawivunga chuan, zirlaite chu tun hun atanga tum neia zir tura chahin, All India Services leh Central Services nih tum a pawimawh zia a sawi a ni.
Bialtu MLA hian a bial chhûnga zirna in te a ngai pawimawh hle a, Bethlehem Vengthlanga High School tan pawh hian zirna hmanraw pawimawhte pawh a lo pe tawh a ni. He hunah hian bialtu councillor Pi R.Lalawmpuii pawhin telpuiin thu a sawi bawk a ni.
