Mizo Zirlai Pawl (MZP) General Headquarters, Aizawl chuan vawiin May ni 14, 2025 chhun dar 12:00 khan Vaivakawn Cultural Centre-ah Higher Secondary School Leaving Certificate (HSSLC) Examination 2025 Top 3-a Mizo tlingte (Arts,Science & Commerce stream) chawimawina hun a buatsaih a, Pu PC Vanlalruata, Agriculture,I & WRC Dept. Minister chu Khuallian niin hun a hmanpui.
He hunah hian, MZP President Pu H. Lalthianghlima chuan thu sawiin, “MZP in a zirlai ti tha Chawimawina hun kan hman thin chhan chu Mizo zirlaite’n kan zirna kawngah theihtawp kan chhuah zel a, Top -10 emaw Top-3 ah Mizo zirlai a tam thei ang ber kan lan zel theihna tur leh chona siamtu anih zel theihna turin zirlai ti tha Chawimawina hun hi siam thin kan ni” a ti.
MZP President chuan, UPSC exam a inziak tling kan awmlohna a rei ta hle a, kan file pawimawhte leh kan hnam thil keng kual thei turin Mizo zirlai te hian tan la zual deuh deuh turin zirlai kalkhawmte a fuih a, vawiin a kan chawimawite hi veng leh khawtlang an ti hmingtha hle a, officer chhuanawm tak an rawn nih hunah ram leh hnam, khawtlang an ti hmingtha leh zual dawn a ni” a ti. Sum thianghlim lo lakah fimkhur ila, sum thianghlim lo a hausa te’n thalaite ruihhlo ngawl min vei tir a, heng hi khawtlang leh zirlai anga kan do zel a ngaih thu a sawi bawk.
Khuallian Pu PC Vanlalruata, chuan, “Zirna(Education) hi puitling a min siamtu a ni a, zirna chuan kan nunkawng zawh ah min hruai a, dinhmun tha a min din tir theitu chu zirna a ni” a ti.
Khuallian chuan, Zirlaite fuihna thu sawiin, Vawiin a kan chawimawite hi an insum theihna avanga hetiang dinhmun hi thleng thei an ni a, Ruihhlo a ni emaw, Social media lam a ni emaw, eng kawngah pawh insum theihna kan neih a ngaih thu a sawi a, kan ram leh hnam kal zel tur hi tuna thalaite leh zirlaite kutah hian a awm a, kan ramah ruihhlo in a nasa taka bu a khuar tawh a, ruihhlo laka fihlim tum tlat turin zirlai kalkhawmte a chah a ni.
Superintendent of Police, Aizawl District, Pu Rex Zarzoliana Vanchhawng chuan, zirlaite fuihna thu sawiin, Ruihhlo laka fihlim tur leh Drugs hi kan ram hmelma a ni tih hria a, ti chhin ve miahlo tur leh do tlat turin a fuih a ni.
Vawiin-a HSSLC 2025,Arts,Science leh Commerce stream Top 3-a Mizo tling chawimawite hi mipa 4 leh Hmeichhia 4 an ni. Zirlaite hi chawimawina thuziak, pawisa fai cheng sangnga 5,000/- theuh hlan niin, Pu Lalhmachhuana Zofa lehkhabu ziah ‘Mizoram GK Mini Edition’, leh Duhthusam Ram Lehkhabute hlan an ni.
He hun hi MZP General Headquarters Vice President Dr. C. Lalremruata’n a kaihruai a, Major T. Zothanmawia, DYS CND chuan hunserh a hmang a ni.
MZP-in vawiina HSSLC 2025 Top- 3 a Mizo tling chawimawite chu:
*ARTS STREAM*
1. Lalrammawii Tochhawng
2. Zorinmawii
3. Daniel Lalruatsanga
*SCIENCE STREAM*
2na. T.Lalmuanpuia
3na. H.Malsawmdawngzuala
*COMMERCE STREAM*
1na. Kristin Laldinpuii Ralte
2na. Lalhruaikima
3na. Esther VL Roluahpuii
