Mizoram ah chhungkaw 83,264 hnenah Tui pe tawh

Aizawl June 7 : India rama chhungtinin tui herh haw an hman theih nana Sawrkar laipuiin a duan, Jal Jeevan Mission chu Mizoram ah chhungkaw 83,264 pek tawh niin zaa 63% pek tawh anni a, nakum December thla-a pek zawh hman vek tum a ni.
PHE Dept-a Superintending Engineer Lalropuia chuan, Jal Jeevan Mission chu Mizoram thingtlang khua 692 leh mihring chenna hmun dang khaw per 30 dang huam vek thei tura ruahman ani a, a vaiin khaw 722 tuam chhuakin, heng khua ah hian chhungkaw 1,33,132 ten tui connection an dawng vek dawn a ni.
Lalropuia chuan Jal Jeevan Mission chu Rural chauh huamin Mizoram chhunga notified town 23 te a huam ve lo ati a, Jal Jeevan Mission India ram pumpuia kum 2024 a zawh tur tih chu Mizoram ah chuan kum 2023 December thla ah a zawh theih dawn tih a sawi.
Jal Jeevan Mission hi kum 2019 atangin Mizoramah a takin hnathawh tan ani a, Mizoram chhunga khaw 722-a chhungkaw 1,33,132 zingah mi 83,264 pek tawh niin mi 49,868 pek tur an la awm a, tui connection dawng tawh hi za zela 63% niin khaw 315 ah pek ani tawh a ni.
Jal Jeevan Mission chu Central in zaa 90% an tum a, State sorkar in zaa 10% an tum bawk. Mission ah hian Central sorkarin Rs. Vbc. 1376.25 a tum dawn a, Mizoram sorkarin Rs. Vbc. 152.92 tumin a vaiin JJM atan hian Rs. Vbc. 1475.99 ruahman a ni.