Mizoram BJP hruaitute chuan vawiin (10.7. 2025) chhun khan Aizawl Press Club-ah press conference neiin Governor-in Chakma Autonomous District Council (CADC)-in Governors’ Rule-a a puan chungchanga Home Minister K Sapdanga thusawi an chhanglet.
MBJP hruaitute chuan Autonomous District Council (ADC) ah Governor-te chu India Constitution-in thuneihna sang tak a pek thu sawiin, ‘Governor thuneihnaah Council of Minister a rawn tura tih a ni a, an duh dan angin thutlukna a siam ang tih erawh a awm. CADC-ah sorkar an inthlak nasa hle a, eirukna a hluar avangin sum leh paiah pawh an buai hle, financial emergency puan ngai hial a ni,’ an ti.
CADC-a tlawmngai pawl lian pathumte chuan Governor hnenah CADC kal dan tha an tih loh avangin CADC thiata, an tih dik lohte chhui tura an ngen thu sawiin MBJP hruaitute chuan, ‘Governor hnena an ngen ang tho hi Chief Minister hnenah pawh an thlen a, CM hian theihtawp chhuahpui a lo tiam,’ tiin Governor chuan CADC-a siamthat ngai siamtha a, chhui ngai chhui turin Governor’s Rule-ah a dah thu an sawi.
Mizoram BJP hruaitute chuan December 2024 khan Governor chuan CADC chungchangah Mizoram Sorkar ngaihdan a lo lak tawh thu sawiin, ‘Hemi tum hian Chief Minister leh DC& MA Minister chuan CADC hi thiah mai tha an tih thu an thlen daih tawh a ni. Tunah CADC thiah an duh leh lo hi a mak hle, thiah an duhna a la rei lo tehlul nen. Politics-a Governor kaihluh hi tha kan ti lo,’ a ti.
Home Minister-in chuan BJP tan ang deuh ngawr ngawrah Governor a puh nia sawiin MBJP hruaitute chuan, ‘He tha kan ti lo hle. MNF hunlai pawhin Council of Minister duh dan ni loin Governor-in thutlukna ADC chungchangah a lo siam tawh sawizui a ni lo. Hetianga dik lo taka Governor puh hi tha kan ti lo,’ tiin MBJP phei chuan CADC chungchangah hian Governor-ah ngaihdan engmah an thlen loh thu an sawi.
Mizoram BJP hruaitute’n December 2024 khan Chief Minister leh DC&MA Minister-in CADC thiah an duh thu Governor-ah an lo thlen daih tawh thu an sawi.
