Mizoram Sawrkar Budget 2023-2024 Mizoram rorelna sang bera pharh tak chu MPYCC ten kan zirchianin mipui chanvo tur a tlem tual tual a, Sawrkar sum leiba a pung tulh tulh tih chu MPYCC ngaihdan a ni.
MPYCC chuan, “Ram mipuite tan he Budget hi lawmna tur engmah a awm lova, nitin khawsakna a harsa chho hle zawk tur hi MPYCC chuan pawi kan tiin, Finance enkawl thiam leh mi dik – Pu Lalsawta Chief Minister hun a nghahhlelhawm tawh hle a ni.
“Mizoram budget tharah zaa 78 (77.89%) hi Sawrkar hnathawk hlawh leh inrelbawlna atana hman tur a ni a, mipuite tan zaa 22 (22.09%) chauh a ni ang. Hetiang a nih chuan sorkar hnathawk te’n a hun taka hlawh an lak loh chuan engkim mai a buai fo dawn tihna a ni a. Cheng vbch 640.01 teh meuha indaihlo sa tura pharh a ni leh, Budget tharah cheng vbc 272.33 puk belh chung pawha kum tawpah cheng vbch 628.51 zeta indaihlohna awm sa tur hi MPYCC chuan vanduaithlak kan ti takzet a ni.
“Tun dinhmunah Reserve Bank of India (RBI) tarlan danin Mizoram hi India ram state zinga leiba nei hnem ber kan ni a, 2019= 34.9%, 2020= 42.6%, 2021= 56.7%, 2022 (RE) = 55.7%, 2023 (BE) = 53.1%. Hetiang a nih mek laia Chief Minister Pu Zoramthanga, Finance Minister ni bawkin Assembly Session-ah leiba a engto vak loh thu a la sawi mai te kha ram siamthat tumna tak tak a neih lohzia lanna chiang tak niin MPYCC chuan kan hria a. Sum enkawl thiam loh avanga mipuiten harsatna kan tawh thinah Covid 19 chhuanlama an hmang thin pawh hi MPYCC chuan mipuite bum tawh lo turin Mizoram Sawrkar hotute hi kan chah nghal a ni.
“He Budget 2023-2024 hi Budget awmze nei lo leh mipuite beidawnna thlentu tur mai a ni tih hi MPYCC te pawm dan a ni a. Minister te pawhin hnathawhna tur sum an department-ah engmah an nei lova. Chief Minister/Finance Minister tlawn thiam thiam leh tlawn peih, a lang lo lama share pe tam thei Minister/MLA apiang te chet theihna tur Budget a ni a. Mizoram Sawrkar hmalakna lian tham zawng zawng chu Central scheme-ah chauh a innghat dawn tih hi MPYCC ngaihdan leh rin dan a ni,” tiin thuchhuah an siam.
