Vawk pulhri African Swine Fever (ASF) avangin kumin hian Mizoram chhungah vawk 817 an thi tawh ni a report a ni a, ASF vanga vawk suat tawh zat chu 1,034 a tling a ni.
Animal Husbandry & Veterinary Dept in a chhinchhiah danin nimin khan ASF vangin Chhingchhip khua-ah vawk pakhat a thih belh leh a, nimin vek khan vawk 17 suat a ni. ASF vanga vawk thi zat hi Kum 2021-22 khan 33,417 a ni a, kum 2022-23 khan 12,795 a ni a, kum 2023-24 chhungin 1,139 niin heti hian a vaiin ASF vanga vawk thi zat chu 47,351 a ni tawh a ni. ASF hri kai vanga vawk suat tawh zat hi kum 2021-22 khan 12,568, kum 2022-23 khan 11,686, kum 2023-24 chhungin 980 niin heti hian a vaiin vawk suat zat chu 25,234 a ni tawh a. Vawk thi avanga tanpuina dawng chhungkua 2,488 an awm tawh a. AH& Vety Dept chuan ASF vanga vawk chante tanpuina tur Rs.311,66,000 an dil mek bawk.
Tunlai khawlum chhovah ASF hri a leng chho leh a, ran damlo nei an awm a nih chuan Animal Husbandry & Veterinary Dept phone no 1962 ah Doctor te biak rawn theih reng an ni tih AH & Vety Dept Deputy Director Dr.M. Zohmingthangi chuan a sawi a ni.
