Vawiin khan Mizoram Firearms Bureau in Mizoram Police hnenah GS Arya Mess, PHQ, Aizawl-ah ralthuam a hlan. He hunah hian Home Minister Lalchamliana chu khuallian a ni a, 3rd Battalion MAP ten Guard of Honor an pe a ni.
Minister Lalchamliana chuan silai man tur awm lo se tih hi duhthusam a nih laiin mimal emaw midangin silai kawl thiang lo an kawl emaw, sawrkar hnenah hlan emaw an awm hi hnathawktute hmalakna leh inpekna a ni tih a hriat a, heng ralthuam silai, silaimu leh granade Mizoram Firearms Bureau in Mizoram Police hnena a hlan tur hi police ten tangkai taka an hman a beisei thu leh, mipui himna chu Mizoram Police te ngaih pawimawh ber a nih thu a sawi bawk a ni.
Minister chuan silai leh a mu te hi Judiciary in uluk taka an ngaihtuah tawh hnuah an case tifelin, Mizoram Firearms Bureau-ah an hlan a ni tih kan hriat a tul a ni a ti a. Tun hma chuan Civil mi te pawn an kawl theih silai a awm thin a, tun hnuah erawh chuan dan lo ang a miin silai kawl an lo awm chuan Mizoram Firearms Bureau in hma la in, fel fai takin a tiral tawh thin dawn a ni a ti.
Khuallian chuan “Mizoram Police te hian a theih chin chinah ralthuam tha ber ber tunlai ber ber nei se tih hi sawrkar duhthusam a ni a, amaherawhchu sum leh pai lamah duh khawp kan neih thin loh avangin duhthusam ang zanin ralthuam kan lei thei thin lo a, chuti chung chung chuan ralthuam thar ber ber te sawrkarin a lei ve reng a, kan Police te ralthuam neih hi a zahpuiawm loh hle a ni,” a ti.
Minister chuan kuhva chingtu a bik takin Hachek tlangdung leh Bilkhawthlir a ching tuten harsatna an tawk mek tih sawrkarin a hriatpui thu a sawi a. Mizoram sawrkar chuan Assam sawrkarah thlenin, Assam pawhin an tuar thu dawn a ni a, Mizoram chauh lo Tripura pawhin an tuar tih thudawn a ni leh bawk a, hemi chingfel tur hian Home Secretary level ah te inbiakna awmin, Home Minister pawh hian lehkha a thawn tawh thu a sawi a, vawiin ngeiah pawh hian hemi chungchang hi Union Home Minister hnenah lehkha a thawn tur thu a sawi bawk.
Minister chuan Police mi 304 compassionate ground a lak turin tha thara buaipui a nih thu sawiin, hei hian kum 2019 hunlai daih a verification leh re-verification tih tawh chauh a huam tiha a sawi a, a hnulam a mi chu ngaihtuahnaah a tel thei hrih loh thu a sawi bawk.
Mizoram Police hnenah hian ralthuam hrang hrang AK Type 56 Rifle, AK Type 81 Rifle, M4 A1 Carbine, MA3 MK-II Rifle, MA3 MK-II Rifle bakah a dangte hlan a ni a. A vaia ralthuam hlan hi 49 a ni. Hlanna Certificate ah hian Mizoram Firearms Bureau & Commissioner & Secretary hming leh DGP Mizoram hming te a chuang a ni.
He hun hi DGP Mizoram Devesh Chandra Srivastva chuan a kaihruai a. IGP (Hqrs), Mizoram John Neihlaia chuan lawmthusawiin he hun hi a khar a ni.
Mizoram Firearms Bureau hi February ni 10, 2021 a din a ni.
