Ni 28.07.2023 hian Congress Bhawan, Golden Hall-ah Friday Political Session neih a ni a. He hunah hian Lalsanglura Ralte chuan thu a sawi a ni.
He huna thusawitu Lalsanglura Ralte chuan, “Mizoram hian Babulon Politics ni lovin Jerusalem Politics hi kan mamawh a. Babulon Politics-ah chuan Pathian a lang lova, mahni tih theih emaw tiin mihring chakna an hmang a. Jerusalem Politics-ah erawh chuan mihring chakna leh mahni hmachhuanna a lang ve lova, Lal Davida Lalram thlenna Politics zawk hi Mizoram mamawh a ni,” a ti.
Pu Sanglura chuan, chimral kan nih hma hian kan harh chhuah a va ṭul em. BJP in hindu ram siam an tumna te hi tih takzeta kan ngaihtuah a ngai a. An ni thawhpui zawnga hma la duh Party phei chu tumah hian thlawp lo ngam ang u, a ti a. Lalpa tana ding tlak, Lalpa tana ding ngam Kristian kan nihzia hi kan tih lan a hun tawh a. Kan rama Muslim tamzia te hi ngaihtuah a, Kristian lal ram din thar leh a ngaihzia hi uluk taka kan ngaihtuah nawn a ngai tawh takzet a ni, a ti bawk.
Pu Sanglura chuan, Party ṭhenkhatin Development ringawt ngaihtuaha an kal lai hian Congress Party chuan Kristianna hi kan tarlang ngam tur a ni. Congress Party ka rawn zawm chat nachhan te hi sakhaw zalenna duhtu leh a taka kalpuitu in ni hi a ni a. Develoment kan duh rualin Sustainable Development hi a pawimawh a. Sustainable Development a thlen dawn tak tak chuan Secularism a palzut thiang lova, sakhaw zalenna tel lovin a kal thei lo a. Tin, mi rethei tana ding tlat ṭhin Congress Party hi Mizoram mipui te’n zawm zel i la, lungrualna leh inpumkhatna hmangin ram ṭha kan siam ang a, kum 2023 MLA General Election-ah hian chakna kan chang ngei ang tih ka ring tlat a ni.
He hun hi Pu T. Sangkunga, Ex-MLA chuan kaihhruaiin, Pu Ngurdingpuia Pachuau, Sr. Vice President MPYCC leh Nl. Elizabeth Malsawmtluangi, Member, Social Media Deptt. MPCC te’n report an pe a. John Lalthangliana leh Janeth Zaneihkimi te’n kalkhawm mipuite zaiin an awi bawk a ni.
