Lunglei District Congress Committee chuan Devotion & Political Session an hmang a, he hun hi Pi R. Lalhmangaihzuali GS chuan a kaihruai a, Pu L. Zoliana Secretary SWCC in hunserh a hmang bawk.
Political Session huna thusawitu LDCC President Pu R. Lalnunthara chuan, AICC boruak thlirin hma kan sawn nasa a ni tiin, Congress Party leh a kaihhruai te’n State hrang hrang inthlan lo awm turah hma an sawn zia nitinin kan hmu thei bawk a, a lawmawm hle a ni a ti a. MPCC a kan hotute an taimain an lungrual a, chutiangin LDCC huamchhung pawh hi ngun taka kan en a, kan chik chuan kan boruak ri hut hut lo mah se, nghet takin ke kan pen tawhnaah kan la kal zel a, Party chhung mai ni lo, pawn lam mite pawhin kan kal dan nghet tak hi an rawn hmu a, kan lam an rawn hawi mek a ni a ti.
Pu Mathara chuan, Central Sorkar leh State Sorkar sukthlek enin Congress Party hi a thochhuak leh ang a, a Sorkar leh ngei dawn a ni tiin. Congress Party chuan kan ti ang kan tih hi a takin kan ti ṭhin a ti a. NLUP chungchang sawi nawn lehin kum 1989-1998 inkar chhungin a mamawhtu chhungkaw 39,214 hnenah rangva quality ṭha chi bandel 4 ṭheuh pek an ni a. Kum 1989 – 1998 chhungin chhungkaw 78,479 hnenah Rs 30,000 ṭheuh pek an ni tiin. Kum 2008 – 2018 chhungin chhungkaw 1,40,736 hnenah Rs 1,00,000 aia tlem lo ṭheuh pek an ni bawk a ti a. NLUP kha Congress Party chauh kan pe lova, pawn lam mi a mamawhtute hnen a thleng phak a ni tiin, NLUP changtlung leh ṭha zawk kan buaipui dawn avangin he Party hi a Sorkar leh ngei dawn a ni a ti.
Mizoram hmasawnna ruhrel lian tak tak hi Congress Sorkar sulhnu a ni tiin, Lengpui Airport te pawh hi Pu Lal Thanhawla kaihhruai Sorkar hma lakna a ni tiin, Choak bak a ṭum lo ang an tih kha a ni a, kum 1995 bul ṭan niin kum 3 chhung lekin puitlin a ni a ti a, zirlaite, sumdawng, damlo chenin Lengpui Airport hi kan chhawr hle a ni a ti. Tuirial Hydel Project, GLWSS Phase 1 vawiin thlenga Lunglei mipuiin kan rin ber te, Mizoram Engineering College, Pukpui pawh Congress Sorkar laia din leh sak a ni tiin, ATL Road thleng hian Congress Sorkar bul ṭan vek a ni a ti a. 132 kv sub station Melriat pawh hi Congress Sorkar hmalaknaa siam niin kum 2016, Dec. ni 14 khan Pu Lal Thanhawla’n a hawng a ni tiin, NLUP bakah NEDP te kha hmasawnna ruhrel siamna leh dinna tura ruahman a ni a, kum 2018 khan Congress kaihhruai Sorkar leh ila chuan Circuit House Lunglei changtlung leh ṭha tak kan siam ngei a rinawm a, By-pass road ṭha tak kan siam ngei bawk ang a ti.
Pu R. Lalnunthara chuan Kum 2018 ah SEDP cheng nuai 3 kan sem ang titu an Sorkar a, NLUP dawng tawh zawng zawng pawh huama pek intiamte kha min thlaktute an ni tiin, tunah Congress ni lo, MNF ni lo, Enchhin Sorkar alo piang leh a, hmunphiah, sawhthing, aieng, hmarcha hmangin kuthnathawktute vote an zawng a, an inzawrhnaah hian an insawi angin Road map emaw Reserch base chuan an kal ta em tih hi mipuite zawhna a ni a ti.
Congress Party Sorkar leh turin mipuiin min beisei mek a, a ti puitling tura ṭan lak a pawimawh thu Pu Mathara chuan a sawi bawk.
