Govt. of India leh Tourism Department, Govt. of Mizoram tangkawp buatsaihin November ni 16-19, 2022 chhung hian Mizoram sorkar chuan Tourism Kutpui International Tourism Mart (ITM) a thleng dawn.
Hemi chungchangah hian vawiin khan Tourism Minister Robert Romawia Royte chuan a office-ah thuthar thehdarhtute kawmin, ITM chu North East India state ten Tourism lama hmasawnna a neih theihna tura Ministry of Tourism. Govt. of India leh a thlengtu state ten kum 2013 atangin an lo huaihawt tawh thin tih a sawi a. He ITM huam chhungah hian state hrang hrang Arunachal Pradesh, Assam, Manipur, Meghalaya, Mizoram, Nagaland, Sikkim, Tripura te bakah state hrang hrang atangin Tourist Service Providers te an tel thin tih a sawi.
Tourism Minister sawi danin ITM-ah hian program hrang hrang cultural program-te, B2B session te, panel session te leh state tin stall tin ten stall hrang hrang siamin tourism lama an hausakna an phochhuak thin a. A thlengtu state ten programme chhungah City Tour an buatsaih thin bawk a, mikhualte chu tourist hmun pawimawh hrang hrangte an tlawhkualpui thin a ni.
Kumin ITM hi AR Ground, R.Dengthuama Hall, Raj Rhavan leh Reiek Tourist Resort-ah te hman tura ruahman a ni a. Mizoram State Mega Exhibition hi AR Ground-ah mipui tana huaihawt a ni dawn a, nawktuk chawhma dar 10:30-ah Commerce & Industries Minister Dr. R. Lalthangliana’n a hawng ang. Hetah hian food court, stalls, exhibition leh live performance hrang hrang mipui mit titlai tur en tur engemawzat a awm ang.
ITM hi a thlengtu state ten nasa takin tourism lamah hma an sawnpui thin bakah sumdawng leh Tour operator ten hlawkna nasa tak an hnuh phah thin a, Mizoram-in a la thlen ngai loh anih avngin inbuatsaihna pawh nasa takin kalpui mek a ni. ITM atan hian Mizoram sorkar chuan cheng nuai 200 a sanction a, a hlawkna hi tun atanga kum tam tak thleng tel tur a awm nia ngaih a ni.
