Ministry of Housing & Urban Affairs-in a buatsaih Swachh Bharat Mission (Urban) hnuaia Swachh Amrit Mahotsav kalpui mekah inelna hrang hrang te buatsaih a ni a. Chung zinga India ram khawpuite inelna pakhat Youth-led inter-city competition Indian Swachhata League (ISL) Youth Rally for Garbage Free Beaches, Hills & Tourist Places chu September ni 17, 2022 khan Indian ram pumah neih a niin, Mizoram atangin khawpui sawm (10) an tel a ni. He Youth Rally-ah hian India ram khawpui 1800 chuang an inel a, mi 5,00,000 (nuai 5) chuang hemi niah hian an thawkchhuak a ni.
He inelna lawmman hi September ni 30, 2022 ah Talkatora Stadium Auditorium, New Delhi-ah sem a ni a, Mizoram khawpuite atangin hengte hian an Category theuhah ‘Best Team Award for Exceptional Performance’ lawmman an la a ni.
1. Aizawl Clean Avengers- (1 lakh to 3 Lakh population category)
2. Lunglei Legion- (50K to 1 lakh population category)
3. Saitual Green Warriors – (Below 15K population category)
4. Champhai Nature Conservancy – (25K to 50K population category)
Indian Swachhata League endiknan hian tehfung 3- Thalai thawkchhuak tam (scale of participation), hmalakna danglam (innovativeness & Uniqueness) leh nghawng tha a neih dan (impact of the activity) te hman a ni a. Mizoram khawpui hrang hrangah hian Team tinah College zirlai – NSS Volunteers, Eco Clubs, Adventure Club te bakah Sikul naupang te pawh an tel a, Naupang ber atanga MUP member thlengin Youth Rally-ah hian an thawkchhuak a ni.
Swachh Bharat 2.0 in kum khat a tlin lawmna atan Ni 1.10.2022-ah Talkatora Stadium Auditorium, New Delhi ah vek India Ram Khawpui Fai Endikna, Swachh Survekshan 2022 lawmman sem a ni bawk a, hetah hian Mizoram atangin khawpui 2 in lawmman an dawng leh a ni:-
Lunglei- Clean City in North East Zone _(50k – 1 Lakh Population)_
Serchhip- Best City in Citizens Feedback in North East Zone _(15k – 25k Population)_
Lawmman dawng tur hian Mizoram atangin Pu H. Lianzela, Director, UD&PA, Serchhip DC, Pi Nazuk Kumar, Lunglei DC Pu Kulothungan te leh Department aiawh te leh VC aiawhte an thawkchhuak a ni.
Mahatma Gandhi piancham lawmna puala October ni 2, kum 1977 atanga kum tina Mizorama hman thin Faina Hapta (Cleanliness Week) chu tan a ni leh ta a. Faina Hapta 2022 hi Mizoram khawpui (notified towns) zawng zawngah chuan October ni 1, 2022-ah a hawnna runpui neih a ni a, Aizawl leh Serchhip-ah erawh chuan rokhawlhna a awm avangin October ni 3, 2022 ah hman tura ruahman a ni. He Faina Hapta hawnna ni hi Swachhata Diwas ‘Faina Ni’ atana hman niin, Khawpui tina veng zawng zawngah ‘Faina Hnatlangpui’ neih a ni a, Faina Hapta chhung hian in, zirna in, sumdawnna hmun, sakhaw hmun leh sawrkar pisa ah te bawlhhlawh thliarhran inziritirna beihpui thlak a ni ang.
UD&PA Department chuan Award kan dawn theih nana thawktu zawng zawngte, mahni ram tan tia Faina kawnga mi thahnemngai tak takte chungah lawmthu a sawi a. ‘Mipui tanrualna leh inlungrualna avang liau liaua hetiang Award dawng thei hi kan ni‘ tiin Pu H. Lianzela, Director UD&PA chuan Mizoram mipuite chungah lawmthu a sawi a, tun aia nasa zawka tang sauh sauh a, India rama Khawpui Fai Ber nih tum turin ram mipuite theihtawp chhuah thar leh turin a sawm a ni.
