Vawiin 7.7.2025 hian Mizoram Pradesh Congress Committee chuan Congress Bhavan-ah Monday Devotion leh Political Session an hmang a, he hunah hian MPCC General Secretary Lalhruaitluanga Bawihtlung chuan thu a sawi.
Lalhruaitluanga Bawihtlung, “Mizoram in remna a neih chungchangah hian tu emaw chuan dikhlel taka sawi a nei fo mai a. Mizoram in remna kan neih theih nana a kalkawng bumboh zia te thangtharte hian kan hre lo.
“Remna a awm theih nan khan India sorkar aiawha Laldenga be tu(interlocutor) G. Parthasarathy thlak anih avang leh Laldenga’n Prime Minister Indira Gandhi remna leh muanna chungchang sawipui tura a hmuh ni tak October 31, 1985 khan Indira Gandhi thah a nih avang te anih bakah remna leh muanna sawi turin Central lamah ministry siam an awm loh avanga politics a chiri avangin a ni. India Gandhi kahhlum a nih hnua a fapa Rajiv Gandhi an kum 1984 Lok Sabha inthlana chakna a chan hnu December 31, 1985 khan hmalak zui zel a ni a.
“Rajiv Gandhi khan Assam Accord te pawh neih anih theih hialna chhan India aiawh G.Parthasarathy an a draft Mizoram Accord kha a duh lo va. September 1985 khan khatihlaia Home Secretary R.D. Pradhan chu a ruahman tir leh a ni.
“ZKHC hruaitute chuan April 12, 1985 khan Rajiv Gandhi an kawm a, remna leh muanna a awm theih nana hmalaksak turin an ngen a. Rajiv Gandhi chuan ‘Kan lo ngaihtuah ang e’ tiin a chhang a ni.
“ZKHC hruaitute chuan 18.4.1986 khan Zoram buaina chinfel a nih theih nana a hmalaknaah Pu Lal Thanhawla puihna avangin lawmthu an sawi nghe nghe a ni.
“Pu Lalduhoma hian khatihlaia Congress sorkar CM leh Cabinet Minister ruatte phiarrua a lan tak avangin ni 12.3.1986 a Congress MLA rual Assembly room a kalkhawm chuan MPCC President a nihna atanga banna thehlut turin an ti a, ni 16.3.1986 ah MPCC president atangin banna a thehlutta a ni.
“Ni 1.4.1986 khan Congress party atanga a banpui mi thenkhatte nen party thar Congress for Peace an din tak avangin anti-defection law hmangin ban a ni ta a ni. Hei hi MP atanga ban a nihna chhan dik tak niin Remna leh Muanna nena inkaihhnawihna a nei lo.
“MNF ho leh Pu Lalduhoma ten chhe taka an puh thin angin Mizoram in remna leh muanna kan neihna tura Peace Accord sign thuai anih lohna chhan chu Pu Lal Thanhawla’n a lalthutthleng ken a hreh vang tiin an puhna lo dik lo hle a ni.
“Kum 1986 (Peace Accord) sign vat a nih lohna chhan chu Pu Lal Thanhawla’n CM Post Pu Laldenga ken a hreh avang ni lovin Central India lamah Pu Laldenga nen an inhmuhna ni tur a ruat October 31, 1984-a Prime Minster Indira Gandhi thah anih avang te, Mizoram Peace Accord tura siam hmasa zawk cancel anih avang te leh India aiawha MNF hotupa Laldenga be thin tu September, 1985 a thlak anih avang te a buaina an neih avangin Mizoram ah Congress in 1984 sawrkarna an siam ve leh a remna leh muanna Mizoram in kan neih lohna chhan chu a ni zawk tih hi a chiang hle a ni,” a ti.
Monday Devotion leh Political Session hi MC Hlunthanga, State Organiser in kaihruaiin, John Siamkunga, Adviser, MPCC chuan Pathian thuchah sawina a nei a.
He hunah hian Congress hruaitu hlun leh MPCC Adviser Sanghlira Colbert, Pathianni a Lungleia van kohna chhanga min kalsantu sunna MPCC President Lal Thanzara kaihhruaina a neih niin minute khat chhung ngawi renga dinga hun hman a ni bawk.
