Ministry of Development of North Eastern Region (MDONER) Parliamentary Consultative Committee vawiina New Delhi-a thutkhawmnaah Mizoram MP (LS) C Lalrosanga chuan Mizoram khawchhak lam leh chhim lamah thlawhtheihna tumhmun siamna tur hma la turin Sawrkar Laipui a ngen a. Hmarchhak biala ramchhung leh rampawn zin mi tam zawk hip luhna tur leh enkawlna tha zawk siamsak chungchanga DONER Minister G Kishan Reddy hova MP te leh Ministry hrang hrang aiawhte thutkhawmnaah C Lalrosanga chuan Mizoramin thlawhna tumhmun pakhat chauh a neih hi a tawk lo a, tourism leh kawng danga hmasawnnan Mizoram khawchhak leh chhim lama thlawhna tumhmun neih ngei a tul a ni tiin a sawi a. Hemi kawnga hmathar la chak turin Civil Aviation Ministry thuneitute a nawr a ni.
MP chuan Mizoram chhim lam thlenga relkawng phah turin Railways hotute a ngen bawk a, hemi kawnga hma lo lak tawhte tharthawh leh turin Railway Board aiawhte a ngen bawk. Mizoram chhim leh khawchhak lamahte zinmite tlawh duh tur hmun hrang hrang a awm a ni tih sawiin thlawhna, rel leh lirtheia tlawh tur hmun hlui leh mawi tak tak tlawhpawh leh tihchangtlun turte te a awm a ni a ti. Lawngtlai district a Kolodyne Luidungah lunghmun mawi leh hmuhnawm tak takte zinmite tana tlawhpawh leh en theiha siam a nih theih dan turte sawiin MP chuan hmalakpuiah DONER Minstry hotute a sawm a. Mizoram khawchhak lama pipute sulhnu humhalh chunga zinmite tana tlawhpawh theihna tur ruahmanna siam a rawt bawk a ni.
DONER Ministry Parliamentary Consultative Committee thutkhawmnaah hian DONER Minister of State B L Verma, Hmarchhak MP-te, DONER Secretary, NEC Secretary leh Ministry hrang hrang aiawhte an tel a ni.
