Mizoram Legislative Assembly chu National e-Vidhan Application (NeVA) hmang hmasa zingah telin, digital hmangin hna a thawk tan ta a. NeVA hmanga Session hmasa ber chu ni 6 September, 2022 khan neih a ni.
NeVA hmang hian lehkha hmang lova digital-a indawr tawnna leh House proceedings pawh kalpui tum a ni a. Hemi hmang hian Assembly Session pumpui digital veka kalpui tur a ni ang.
Speaker Lalrinliana Sailo chuan hemi chungchang hi sawiin, “Tun tum Session kan tan rual hian NeVA kan lo hmang tan dawn ta a. He project a hlawhtlin theihna tura sum pechhuaktu Ministry of Parliamentary Affairs, Government of India chungah leh State matching share min petu kan State sorkar chungah lawmthu kan sawi a. Hun rei lo te chhunga a hlawhtlin theihna tura thawktu, implementing agency SBL-te chungah pawh kan lawm hie bawk a ni” a ti.
NeVA hmang hian dan siam dan kalphung te, report leh documents dangte awm hmun atanga a thlen chin hriat zung zung theihna te, thil hriat duh awlsam taka en mai theihna te leh English leh Mizo tawng hmanga chhiar theihnate a awm dawn a ni. Member-te’n awlsam takin an phone leh tablet hmangtein House Business an kalpui thei tawh dawn a ni. NeVA kaltlang hian Mizoram Legislative Assembly chuan lehkha hmang lo State Assembly (Paperless Assembly) a nihna tur kawng a zawh mek a. Hei hi tihhlawhtlin a nih hunah chuan lehkha hman ral tur tarn tak a pumpelhin sum hmanral nasa takin a ti tlem dawn bawk a, chu chuan kum tina thingkung tarn tak kih thinte ti tlemin, faina leh thianghlimna bakah UNDP Sustainable Development Goals tihhlawhtlinna kawngah hmasawnna a ni bawk dawn a ni.
NeVA hmanga Assembly Session hmasa ber neih a nih rual hian, Member zawng zawngte pawn hemi hmang thei tura a tul anga training pe chhunzawm zel turin Mizoram Legislative Assembly chu a inbuatsaih bawk a ni.
