MPYCC chuan, “Mizoram mipuiten kan hunpui Krismas leh Kumthar lawmna tluang taka kan hmang thei chu Mizoram Pradesh Youth Congress Committee chuan lawmawm kan ti hle a, Mizoram mipuite Kumthar 2023 chibai kan bukin duhsakna kan hlan a, Sawrkar tha kan neih ngei theih nan tun atanga ngaihtuahna seng turin mipuite kan ngen bawk a ni.
“Hetihlai hian Mizoram sawrkarin Halpuah leh halmawi hal a khap chunga Kumthar 2023 lawmna December ni 31, 2022 zanlaia Aizawl leh khawpui thenkhatah nasa taka hal a ni chu dan leh thupek kenkawh kawngah Mizoram sawrkar a fail chianzia lanna pakhat niin MPYCC chuan a hria a. A hminga a mawiah chauh thupek chhuah tawh lovin, thupek kenkawh kawngah pawh tan la turin Mizoram sawrkar, a bik takin Home Minister chu kan chah nghal a. Hetiang zel anih chuan a huai huai leh a chak chakte Lalna ram (lawlessness state) ah kan chang mai ang tih pawh MPYCC chuan a hlau hle a ni,” an ti a.
“Halpuah hal khapna thupek chhuah a nih lai hian Halpuah leh halmawi thlalak tam tak chu Mizoram Tourism Department official page hrang hrang – facebook, twitter etc hmangin thehdarh a ni leh lawi si kha MPYCC chuan mak a ti hle a, Mizoram sawrkar chu kaldan mumal nei lo an nihzia tilangtu niin; a thenin an khap a, a thenin an lo thehdarh kha Home Minister thupek chhuah chu Tourism Minister-in engah mah a ngaih lohzia leh MNF party chhungkaw buaizia buichhia laih lovin an inpuang chiang hle a ni.
“Chuvangin, kumin kum tawpah Mizoram inthlanpui kan hmachhawn leh dawn tawh a, sawrkar tha leh rintlak, eiru lo leh sum enkawl thiam sawrkar a din ngei ngei theih nan, Mizoram mipuiten mi hmingtha leh enchhin chawp ve ngai lo MPCC President Pu Lalsawta chungah rinna nghat a, Mizoram-ah Sawrkar tha a lo pian theih ngei nan lo thlawp theuh turin Zoram mipuite MPYCC chuan kan sawm takzet che u a ni,” an ti bawk.
