Vawiin Dt 13.1.2025 (Thawhtanni) hian Mizoram Pradesh Congress Committee chuan an office, Bhavan hawn inkhawm Golden Hall, Congress Bhavan ah an hmang a, he Bhavan inkhawmah hian Pu Lal Thanzara, President chuan Kumthar thuchah sawiin, “Kumthar atana ka thuchah duh che u chu Thufingte 16:3 ah chuan ‘Lalpaa innghatin thil ti la, i thiltum chu a hlawhtling ngei ngei ang,’ a ti a. “Congress party ten kan thiltih turah te Lalpaah innghah nachang i hre thar zel ng u,” a ti bawk.
Lal Thanzara chuan, “Kum kalta khan kan Party in Pathian malsawmna leh kaihruaina tam tak kan dawng a, hruaitu tha tak tak kan unit te kaltlangin min pe a, a lawmawm takzet a ni. Chutih lai chuan kan thawhpui Congress Member boral ta zawng zawng te kan ui em em a, an chhungte pawh kan tuarpui em em a, an chhungte tan Pathian awmpuina i dilpui zel ang u.
“Tun kar kalta khan Mizoram BJP President chuan an party office hawnnaah kan sawrkar hi Central BJP hotuten an thlir reng thu leh lei ven that a tul thu a sawi a. Hman deuh khan BJP MLA Pu Beichhua chuan, ‘Kan harsatna sutkianna tha ber tur chu zawm mai a ni.’ tiin a sawi bawk. Heng Mizoram BJP hruaitute thusawi hian awmzia a nei thuk viau awm mang e. Ka hmelhriat pakhat, Central BJP hruaitute nena innel tak pakhat chuan kan sawrkarin Central-a Project an zu thehluh te hi Central khuan tihhlawhtlin an chak viau loin a sawi a, dawt a sawiin a rinawm loh a ni.
“Hmanni lawk April 2025 khan Assam Rifles chhuah hun tur kha a lar a, tunlai hian Ferbruary ni 20 a lar leh ta a. Kan sawrkar hian VC Term pawt tawiin Febuary ni 19 ah an ti tawp a. Chumi hma chuan VC inthlan a ngai ngei ngei a ni. Sawhthing an lei theih dawn leh dawn loh hriat a nih hma inthlan zawhfel ah duh a, VC inthlan zawh ah chauh sorkarin sawhthing lei an tum hi a ni.
“Tuirial Hydel Project, MNF ten nasa taka an sawpchhiat tawh Pu Lal Thanhawla hova kan tharthawh leh a kan tih puitlin tak pawh hmanni lawk khan Power Minister chuan sumthuninu anih thu a sawi a, anchhe dawng angah an chhuah a ni. Chief Minister Adviser pakhat phei chuan, ‘Bomb chhiat law law tur emaw ni.’ ati a ni awm e. January ni 9 a Vanglaini Chancinbuah bulthut atanga engkim hria in thil awmzia a rawn ziak han chhiar chuan, BJP State President in lei ven that a tul thu a hriatchhuah loh theih loh a ni.
“Special Assembly a ka puan tawh ang khan, Congress kan sawrkar leh anih chuan kan Bible in a sawi, ‘Heng ka unau te ber te chunga in tih hi ka chunga ti in ni’ a tih angin, Mizoram mipuite tan NLUP kan tharthawh leh dawn a ni.
“Boruak thianghlim kan neih theih nan Halpuah leh Halmawi Kristmas leh Kumhlui thlah zana Sawrkarin a khap chu Kohhran leh Central YMA te thlawpna avangin kum dang aiin kan uar lo kha a lawmawm ka ti a. Ram leh mipuite thatna tura sawrkar hmalakna te chu Congress Party chuan kan thlawp zel dawn a ni.
“Kan khawtlang nun leh dinhmun kan hria a, ruihhlo in min run mek a ni. Natna hrang hrang leh Cancer kan vei nasa em em te, neih inang inkawp an lo pung ta te hi keini Kristian ram inti te tan a inhmeh lo em em a ni. Heng hi kan vei a hun tawh em em a, thalai hetiang vei mite siamtha a, politic a rawn lut turin kan sawm che u a ni. Kan party engemaw vanga min chhuahsan ta te pawh rawn let leh turin ka sawm che u a ni.” a ti.
He huna thu sawitu AICC Member leh Mizoram Chief Minister hlui, MPCC President rei tak lo ni tawh Dr Lal Thanhawla pawhin thu sawi in, “Kan hotute hian kan tih theih loh tur ti turin an insawi ngai lovin ka hria. Lengpui Airport kan siam lai pawh khan ‘Choak bak a tum lovang’ min tih sak thin. Mahse kan hman tangkai zia in hria a, a hlawhtling hle a ni. Amaherawh chu tihral chak tlat te kan lo awm a, a pawi hle a ni.
Look East Policy te hi kan hotuten hmathlir thui tak neiin an ruahman a ni. Khawchhak lam Vietnam, Cambodia leh Myanmar thlengin kan insumdawn tawn anga, kan inunauna pawh a lo tha chho ang kan ti a, Prime Minister Manmohan Singh pawh khan tha a ti hle a ni. Champhai thlengin kawng kan sial a, tunah chuan kawng tha tak kan lo nei ta a ni. Amaherawh chu sawrkarah kan awm ta lova, kan ruahman angin kan tihlawhtling hman ta lo a ni.
Tun kum thar hi Congress tan kumthar lawmawm lo nise, kan inlungrualna kum lo nise, sawrkar leh tura tan kan kak zelna atan malsawmna kum lo ni se tih hi ka duhthusam a ni.”
MPCC President kalchhuak leh Minister hlui ni bawk Pu Lalsawta pawhin thu sawi in, “Politics a kan awm chhan ber chu mipui tan a ni. Amaherawh chu sawrkarna kan chan loh chuan ram kan hmangaihna te hian awmzia a nei lo. Nikum hmasa kum 2023 a kan i thlan khan Zoram mipui, thil tha duh tak tak te chuan ZPM an vote tling ta a. ZPM hian inthlan hma a an rilru an thlak em ka hre lova, ZPM vote duhtu mipuite, thil tha duh tak tak te hian sawrkar tur chuan min vote a ngai a ni. ZPM hi sawrkar tha an ni lova, khum an har dawn lo. Kan hotute hi an tha tih ka hria a, ka ringtawk bawk a, kumthar atan hian duhsakna ka hlan che u a ni.” a ti.
Congress Bhavan hawn inkhawm hi Pu Ronald Sapa Tlau, Vice President, MPCC chuan a kaihruai a, Commissioner Lalkiamlova’n hunserh a hmang a, MPCC President Pu Lal Thanzara hian mithar lawmluhna a nei bawk a ni.
