Ni thum(3) awh tur 26th Mizoram Official & 18th Mizoram Poomsae Taekwondo Championship 2025 Electric Veng YMA Halla buatsaih chu Vawiin June 18, 2025 khan Home Minister K. Sapdanga chuan a hawng a. H. Lalhmingthanga, MCS, Director SYS Dept. chuan a hmanpuiin fuihna thu a sawi bawk.
June ni 18 – 20, 2025 chhunga neih tur Championship-ah hian Mizoram district hrang hrang atangin Team 30 an rawn tel a. Poomsae leh Kyorugi hmanga inelna neih tur niin Poomsae-ah mi 148 an tel a, Kyorugi inelna turah player 321 niin an vaiin 469 an tel a. Heng zinga 197 te chu hmeichhia an ni a. Player naupang ber chu Lalruatdiki d/o Lalremmawii, Chhinga Veng niin kum 5-a upa a ni.
MATA buatsaih inelna lian ber Mizoram Official Taekwondo Championship-a Gold medalist te hian Mizoram Champion of Champions Title 2025 an chuh thei dawn a. National/Regional inelna hrang hrangah Mizoram aiawh turin thlan a ni bawk ang.
Home Minister K. Sapdanga chuan MATA chu Association entawn tlak ni zel turin a fuih a, Inenkawlna te, National achievement te, khawtlang tana hna tha tak an thawh thin te chu Sawrkarin a hriatpui a, chhunzawm zel turin a fuih a. Kum 2036 Olympic thlirin Taekwondo player atangin an tel ngei theihna tura tan la turin a fuih bawk. Hemi kawngah hian insum theihna te, zuk leh hmuam ruihhlo laka fihlim zel tur in a chah bawk.
Official Championship, 2025 hawnna inkhawm hi MATA President Prof. Rualkhuma Colney in a kaihruai a, MATA General Secretary Joseph Thansanga’n report pe in, Player aiawh leh Technical Official aiawhten intiamna thu an chham a. MATA Vice. President Pu R. Lalrinmawia’n lawmthu sawina hun a hmang bawk.
He Championship hi Mizoram State Sports Council kum 50 tlin lawmna tura buatsaih a ni
