Lai District Youth Congress Committee chuan vawiin khan thuchhuah siamin, “Mizoram Chief Minister Pu Zoramthanga chuan Lawngtlai hmunah tahrik 18.04.2022 a an Party Office building thar hawnna program hmanga rawn kalin, Lawngtlai Areopagy hmunah MNF Party Lawngtlai Division huaihawtin Public Meeting a nei a. Mizoram in UT kan neih tan tirh ata State Official Program ni lo, Party program neihna hmuna Mizoram Police te zahawmna ti bawrhbanga kalkawngpui dang veka Guard of Honour (Salami Sastra) inpek tir hmasa ber a ni. Democracy ramah hian mipuite thlan Lal (Choice of the People) hi an zahawmin an Lal em em a, hetiang taka thu neihna hmangsuala State Police te meuh zahawmna tih bawrhban a ni hi Lai District Youth Congress Committee chuan pawi a ti takzet a. An sorkar hmasaah khan amah Pu Zoramthanga ngei hian ‘Kum 5 chhung kha in chibai nan hun kan hmang a, kum 5 dang leh kha in zir nan kan hmang leh a, kan sorkar leh hun chuan kan thiam tawh ngawt ang,’ a ti a. An sorkar kum 4 na an hman meuh pawhin thil nih dan leh kalphung pawh hre chuang lo, Chief Minister, Mizoram sum enkawl thiam lo, unaute pawisa kawl thiam em em si, ram hnuai zia ang maia State Police te pawh hrual duhtu kan nei hi Mizoram mipuite kan vanduai takzet a ni.
“Mizoram Chief Minister awm tawh zawnga Autonomous District Council te hamthat ve leh hmasawn ve duh lo bertu, Mara ADC ten an theihtawpa Development Project an siam pawh chhuh luih sak a, a fa chuam Kamrula hnena Contract petu hian, Govt. of India a 125th Constitution Amendment chunchanga ADC te hmasawnna tur duh loa na taka a dodal zawnga a sorkar in comments a pek chungchangah hian ADC area mipuite hnena ngaihdam dil turin kan phut zawk a ni. Chuvangin MNF Party hi minority te tan a tha lo a ni tih hi ADC area mipuite pawhin hre nawna, kan hma lawka MADC General Election ah pawh hian sorkarna Mara mipui ten pe lo turin kan ngen che u a ni.
“Ni dang leh hmun danga MNF Party program ah chuan State Police te ni lovin, MNYF lam zawk hi Guard of Honour inpek tir tawh thin turin Lai DYCC chuan Pu Zoramthanga hi kan chah duh bawk a ni,” tiin an tarlang a ni.
