Mizoram pumah sorkar thar siam leh turin MNF a in sawhnghet chho zel : MNYF

Mizo National Youth Front (MNYF) chuan vawiina thuchhuah an siamah, “Mizoram hmun hrang hrangah MNF sorkar-a rinna nghattu mipui an pung chho zel hi Mizo National Youth Front (MNYF) Headquarters’ chuan lawmawm a ti hle a, kum 2023 Mizoram inthlanpui lo awm turah pawh Pu Zoramthanga kaihhruai MNF in sorkar-na ngialnghet zawk nen rorelna a chang leh ngei dawn tih alang chiang hle ah a ngai a ni,” an ti.
Thuchhuahah chuan, “MNF sorkar-ah mipuite’n rinna an nghah chhohzel avangin khawpui chhungah phei chuan nasa takin MNF in hma a sawn a, October thla chhung ringawt ah pawh mithar 1500 chuang zetin MNF an rawn zawm belh a ni.
“Tin, Aizawl khawpui chhung Local Council 85 awmna a Local Council 76 zetah MNF chuan rorelna a chang mek a. Hetihlai hian Aizawl a Local Council 85 awm atangin Congress chuan Local Council 5 leh ZPM in Local council 2 ah hnehna an chang ve hram a. Congress leh ZPM hi Local Council pahnih ah an thawkdun bawk a ni.
“Congress leh ZPM hi innghahna tlak an ni lo tih khawpui chhung a cheng mipuite’n an hriatchian chhohzel avangin, Aizawl khawpui chhungah Congress party leh ZPM dinhmun nasa takin a tlahniam mek a. Aizawl khawpui chhung a MLA bial 11 awmah Congress party chuan MLA pakhat pawh neilo in an Arte lukawn hial a ni.
“Thingtlang mipuite bum tuma khawpui lama an thatzia nasa taka au puitu ZPM hian an thlawp MLA bial panga (5) chhunga Local Council 45 awm ah Local Council 1 an chang hram a. Hetihlai hian Local Council 41 zetah MNF chuan sangtakin hnehna a chang vek thung a ni,” tiin a hnuai a mi ang hian ZPM thlawp Independent MLA bial 5 huamchhung a Local Council te dinhmun an tarlang :-
Aizawl West-III MLA VL Zaithanzama bial Local Council 9 ah MNF in LC 8, Congress leh ZPM tangdun in LC 1.
Aizawl South-1 MLA C Lalsawivunga bial Local Council 7 ah MNF in LC 6, Congress leh ZPM tangdun in LC 1.
Aizawl South-II MLA Lalchhuanthanga bial Local Council 11 ah MNF in LC 10, ZPM in LC 1.
Aizawl North-1 MLA Vanlalhlana bial Local Council 9 ah MNF in LC 8, Congress in LC 1.
Aizawl North-II MLA Dr.Vanlalthlana bial Local Council 9 ah MNF in hnehna a changfai vek a ni.
“Hetiang hi tuna ZPM dinhmun anih avangin mipuite’n ram kaihhruaina kawngah chuan rinna an nghat ngamlo tih alang chiang hle a. An Leader ber Pu Lalduhoma pawhin, kum 2023 inthlana an sawrkar loh chuan politics khelh a peih tawh loh tur thu alo sawi tawh avangin ZPM hian ral lam an pan mek tih alang chiang hle ah MNF Thalaite chuan kan ngai a ni,” an ti bawk.