Dated Aizawl, the 21st November, 2022 : Congress Thalai chuan, “Mizoram sawrkar hian a hnuaia hnathawkte hlawh a hun takah a pe ngai ta miah lo hi pawi kan tiin zahthlak kan ti hle a. Tlai taka hlawh a pe chhuak thin hian sawrkar hnathawkte dikna leh chanvo a rapbet nasa em em a. Loan la tan phei chuan phurrit a siamin, pawisa an chawibelh (penalty) thin a. Sum enkawl thiam lo MNF sawrkar kan hrawn mek hi vanduaithlak kan ti takzet a nim” an ti.
Vawiina thuchhuah an siamah Congress Thalai chuan, “RTI zawhna chhannaa a lan danin, Mizoram leiba hi 12553.08 Crores (2022-23 BE) hialah a pung chho ta a. MNF sawrkar hnu kum 3 vel chhunga Mizoram leiba a let dawn mai a a pungchho hi a manganthlak takzet a, thangthar lo awm zel turte tan phurrit nasa tak an hnutchhiah hi a la pawi dawn chauh a. Thangthar ten tuna sawrkarna chelhtu MNF party hi an la dem hle dawn niin Congress Thalai chuan kan ring a ni.
“Tin, Local Council leh Village Council te hnenah Mizoram sawrkarin thla sarih chhung (April 2022 atangin) lai an hlawh a batsak hi Congress Thalai chuan pawi kan tiin zahthlak kan ti hle a. A rang thei ang bera an hlawhte hi pe chhuak turin Mizoram sawrkar chu kan phut a. Mahni hna tuldangte kalsana khawtlang tana hnathawktute chanvo rahbehsaknaah kan ngai a ni,” an ti bawk.
