Mizoram sawrkar sum leh pai hi inremchemna nen fimkhur taka enkawl tur a ni : KS Thanga, PAC Member MPCC

Congress Party – MPCC Campaign Committee programme duan lawk angin KS Thanga, Ex-Minister leh MPCC PAC member chuan vawiin chhun khan Tuichang North Block Congress Committee Extended Meeting chu Khawzawl-ah a hmanpui a, Mizoram sawrkar sum leh pai hi inremchemna nen fimkhur taka enkawl tur a ni a, Zoram mipuiten sum leh pai enkawl thiam Congress sawrkar kha an ngai leh tawh em em a ni, a ti.
KS Thanga chuan, tuna kan hrawn mek MNF party sawrkar chu sum leh pai a enkawl thiamloh avangin a mualpho mek a, Congress party sawrkar liamta-in Vaibelchhe 700 (zasarih) lai mai a hnutchhiah kha an hmang zo tawh a, a dang ngaihtuah leh dan an thiam tawhlo a ni. MNF sawrkar-ah sawrkar hnathawk ten a hun takah hlawh an la thei lova, anmahni pawisa khawl that GPF takngial pawh an la chhuak thei lo mek a. Pensioner ten an pension sum an la thei bawk hek lo. Sawrkar hnathawk ten an pension hmaa an pension sum za a sawmkua an dil theihna dan General Financial Rules hnuaia diltute zawng zawng pawh Congress sawrkar lai chuan pek vek an ni thin a. Tun sawrkarah erawh pakhat mah pek theih an nei lova. Financial Mismanagement avangin sawrkar a mualphovin kal ngaihna an hre tawh lo a ni, a ti.
Parliamentary Secretary (Finance) thin KS Thanga chuan Congress Party Flagship programme NLUP sem kha mi thenkhat ten Mizoram Budget atanga sem anga sawiin, thudik chanve (half truth) an thehdarh fo thin a. Budget chhunga khung siin Project siam a hmuh a ni, tiin; Mizoram-in a dawn tur bakah NLUP project atan Vaibelchhe 2871 Central sawrkarin min pawmpuiin, min pek belh zawk a ni. NLUP hi chhungkaw 170000 zet pek niin, eizawnna ngialnghet leh hmasawnna neih phah engemawzat an awm phah bawk a ni, a ti.
Congress party chungchang sawiin, KS Thanga chuan Central-a Congress party dinhmun hniam lai anih avanga Mizoram Congress Party ral mai tur anga sawi fo an awm thin a. Hetiang thu nuihzatthlak sawi thin tute hian Mizoram Congress Party inrelbawl dan leh nihphung an hre chianglo hle a ni. Congress Party sawrkar liamta term hnih chhung khan Central-a Congress Party sawrkar loh avanga Mizoramin a dawn tur dawng lova harsatna a awm hauh lo a ni. Hetiang hi kan ram dinhmun, nihphung anih mek avangin Congress Party workers te leh members te awm mai mai lo tur leh, Congress party sawrkar leh hunah chuan,”Thutak in bâwih a ban dawn a ni”, tiin; Ram rorelna leh enkawlna hi hmui hmanga thawh chi a ni lova, thluak hmanga fimkhur taka thawh chi a nih thu Pu KS Thanga chuan a sawi a ni.
Tuichang North Block Congress Committee Extended Meeting hi Khawzawl Hermon Lalremsanga Inah neih a ni a, Lalroenga Khawzawl Vengthlang Congress Group President chuan a kaihruai a. MPCC Hqrs hruaitu thenkhatte bakah Tuichang North Congress Block hruaitu thahnem tak an tel a, kum 2023 General Election atan thahnemngai taka inbuatsaih chho an rel a ni.