All Mizoram CSS Employee Co-ordination Committee meeting hmalaknain Mizoram Sawrkara CSS hnuaia thawk ten Badge dum belin Sawrkarah lungawi lohna an lan tir a, a hnuai a mi ang hian thuchhuah an siam.
“Hun rei tawh tak atangin Mizoram Sawrkar hnuaia CSS employee ten kan dinhmun hniam lutuk chawikan nan sawrkar dawrin lungawilohna tum engemawzat kan lo lantir tawh thin a. Ni 16 August 2021-ah CSS hnuaia employees hrang hrang te nawrna avangin Sawrkarin Study Group on CSS min din sak a. He Study Group hian Mizoram Sawrkar hnuaia CSS employee te hamthatna tur hrang hrang; Seniority based-a a tahtawl a dahngheh (regularised/absorbtion), CSS employee te tana Recruitment Rules siam, CSS Employee ten Medical reimbursement kan neih ve theih dantur siamsak, transfer TA/DA siamsak leh rawtna hrang hrangte siam a ni a. He Study Group hian kum 2 dawn a zirchian hnuin Recommendation siamin Sawrkarah a theh lut tawh a. Kum 2021 a Study Group din ni tawh si, tun thlenga tih hlawhtlin ala nilo hi All Mizoram CSS Employee Co-ordination Committee chuan pawi kan ti hle a ni.
“Study Group recommendation hi a hlawhtlin theihnan kan hruaituten sawrkar officialte tum tam tak lo dawr tawhin DP&AR changtu Dy Chief Minister hnenah Cabinet Meeting a min pawmsak turin representation kan thehlutin ngenna kan thlen tawh a. Tin, Chief Minister pawh hemi chungchang sawi pui tumin Ni 6, May 2023 khan appoinment dilin tun thlengin kan la hmu thei lo a ni.
“Ni 1 June, 2023 a All Mizoram CSS Employee Co-ordination Committee Meeting chuan Ni 15 June, 2023 thleng a Study Group Recommendation hlawhtlinna kan hmulo anih chuan “Kan kal zel dan tur kan ngaihtuah ang” tiin thuchhuah kan lo nei tawh a. Ni 15 June, 2023 thleng a Sawrkar atanga chanchin kan la dawn loh avangin Ni 16, June, 2023 ah All Mizoram CSS Employee Co-ordination Committee chuan hreh tak chungin Ni 3 chhung (Ni 20-22 June, 2023) hian kan lungawilohna lantir nan Department hrang hranga kan hnathawhna hmun theuhah CSS Employee ten “Badge Dum bel nise” tia kan lo rel tawh chu, vawiin, ni 20.6.2023 thleng hian Sawrkarvatanga thu engmah kan la dawn loh avangin Mizorama CSS hnuaia thawk zawng zawng ten Badge dum kan bel ta a ni. All Mizoram CSS Corrdination Committee hmalakn hi CSS hnuaia thawk ten kan zawm tha takzet a ni. Hemi hun chhunga Sawrkar atanga thu lawmawm engmah kan dawn loh chuan ni 22.6. 2023 hian kan kalzel dan tur kan rel leh dawn a ni.
“Tin, CSS Fund Central atanga lokal a hun takah State Nodal Agency a pekchhuah thin anih loh avangin hmasawnna hnathawhna tur sum leh hlawh a hun takah CSS employee ten kan la theilo thin hi, Central guidelines angin Ni 21 hma ngeiin a dawng tur Nodal Agency ah pek chhuah thin ngei kan phut tlat a, heng kan thu relte hi a hlawhtlin theihnan Mizoram CSS Employee zawng zawngte All Mizoram CSS employee coordination Committee hmalakna ngaichang zel turin kan in ngen e,” tiin an tarlang.
