Dated Aizawl, the 14th March, 2023: Congress Thalai chuan, “Dampa Tiger Protection Force ten thla ruk lai hlawh an lak theih tawh loh thu MPYCC ten kan hriatin pawi kan tiin kan lainat takzet a. Mizoram Sawrkarin an hlawh a batsakte a bo a bang awm lovin a rang thei ang bera pe nghal turin kan phut a, an tihlawhtling thei lo a nih chuan an thlavang hauhin hma kan la zel dawn a ni,” a ti.
Thuchhuahah chuan, “Hlawh batsak an nihna chhan hi zirchianna atanga a lan danin Mizoram Finance Department lamin Dampa Tiger Reserve Field Director account lama pawisa an pek chhuah har vang leh EF&CC Department Mizoram lamin 1st Instalment an hmanna leh an hman chhuahna (Utilisation Certificate) Central lama an thawnthlak har vang a ni hi MPYCC chuan vanduaithlak kan ti takzet a. Mizoram Sawrkar Pu Zoramthanga kaihhruaiin sum a enkawl thiam loh vang leh an inthlahdah vang liau liau a ni a. Central atanga sum lokalte a hmanna tur dik tak ni lo thildanga hman pen leh pawh penin a hrin chhuah harsatna a ni tih chu MPYCC te pawm dan a ni.
“Dampa Tiger Protection Force ten an hlawh an lak theih miau loh avangin Dampa Tiger Forest Reserve chu tunlai hian tih chereu mek a ni a. Duty an awm loh avangin a ruka sapel leh lui kal an pung thar hle nia sawi a ni leh zel a. Sawrkar tha lo leh a ngaihna hre lo hnuaiah Mizoram rohlu Dampa Tiger Forest Reserve kan chan mek chu MPYCC chuan lungchhiatthlak kan ti hle a. An enkawl zo ngang lo a nih chuan tlawmah la lova a ngaihna hria leh sum enkawl thiam Pu Lalsawta leh a thawhpuite hi rawn hreh lo turin Finance Minister Pu Zoramthanga leh EF&CC Minister Pu TJ Lalnuntluanga te chu MPYCC ten kan chah a. Thla ruk lai hlawh la thei tawh lote hian meialh en an hmabak tawh tih hre turin Mizoram Sawrkar thuneitute kan duh bawk a ni,” an ti bawk.
