Aizawl, 22nd April, 2022 : Vawiin thlenga Mizorama vawk pul hri tuartute hnena zangnadawmna pek chhuah a la ni lo hi ZPM chuan mak a ti hle a. Central sawrkar atanga pawisa pekchhuah tawh, Mizoram sawrkar sum bawma pawisa awmsa reng hi kan sawrkar hian engtikahnge pekchhuah a tum tih kan zawt a; a rang thei ang bera vawk vulhtute zangnadawmna pechhuak thuai turin Mizoram sawrkar kan phut a ni.
Mizoramah vawk pul hri leng avangin March – December, 2021 chhung khan khua leh veng hrang hrang 272-ah vawk 29,824 zet a thi a. January – April, 2022 chhung khan vawk 770 a thih belh leh a, hemi chhung vek hian finfiahna nghak mek vawk 205 leh vawk suat tawh 124 a awm bawk a ni.
March 22, 2022 khan Central sawrkar chuan Mizoram sawrkar hnenah vawk vulhtute zangnadawmna tur Rs. 5,84,97,000 a pechhuak tawh a, Animal Husbandry & Veterinary Minister Dr. K. Beichhua chuan vawk thi zat leh a neitute chu sawrkarin fel taka a chhinchhiah thu leh, rei lo tea pekchhuah theih a beisei thu a sawina pawh thla khat a liam ta a. Mizoram sawrkarin a tum ve tur 50% hi a pekchhuah theih loh avang em ni vawiin thlenga vawk vulhtute zangnadawmna hi pekchhuah a la nih loh tih hi AH&Vety. Minister kan zawt bawk a ni.
