Vawiin khan Lalrindika Ralte, MLA chuan Aizawl Press Club-ah thuthar lakhawmtute kawmin, “Mizoram sorkar hian Supply Department kaltlangin FCI-ah buhfai a lei thin a. Central sorkarin kan state quota atana min pek bak kan mamawh belh pawh a man to, economic cost-in lei thin a ni. Kum 2013 vel atang khan FCI atanga economic cost-a a lei thinna aia tlawma open market-a a lei theih tak avangin sorkar chuan FCI atanga a lei thin ti tawpin vawiin thleng hian open market atangin buhfai a lei ta a ni. Hemi avang hian sorkar chuan cheng vaibelchhe tam tak a hum theih phah bawk.
“Tuna sorkarin Supply Department kaltlanga open market-a buhfai a lei dan chu a leina man hi sorkarin a bithliah a, ZIDCO kaltlangin lei thin a ni. Heti chung hian sorkar chuan buhfai lei nan hian sum tam tak a la hloh reng a. Buhfai quintal 1 hi Rs 2750/- in a lei a, quintal 1 Rs.1500/- in a hralh leh a. Quintal 1 zela sorkar sum hloh hi Rs.1250/- a ni.
“Kumin January 2022 atanga June 2022 (Thla 6 chhung) a ZIDCO kaltlanga Buhfai a lei tawh zat chu Quintal Nuai 2 Sing 9 Sang 5 (2,95,000) niin, a lei na’n cheng Vaibelchhe 81 leh Nuai 12 leh Sing 5 (Rs. 81,12,50,000/-) sen a ni. Heta sorkarin sum a hloh zat chu cheng Vaibelchhe 36, Nuai 87 leh Sing 5 (Rs.36,87,50,000/-) tihna a ni. Thla tina sorkar sum hloh chu cheng Vaibelchhe 6, Nuai 14, Sing 5 Sang 8 Zathum Sawm Thum Pathum (Rs. 6,14,58,333/-) a ni. Kum khat chhunga sorkar sum hloh zat chu Cheng Vaibelchhe 73 nuai 75 (Rs. 73,75,00,000/-) vel a ni.
“Tuna Sorkarin buhfai a leina man hi a sang hle a. Hei aia tlawm zawk hian a lei theih ani tih ka hria a. Hetianga buhfai kan leina leh a chhehvela pawisa tam tak luangral hi kan ram sum leh pai indaihlohna thlentu pakhat a ni a. Chuvangin, ram sum leh pai dinhmun siamthat nan leh kan sum hloh a tlem zawk theih nan buhfai kan lei leh a chhehvela pawisa kal ral hi kan tih tawp vat a tul hlein ka hria.
“Buhfai leina man bithliahtu hi sorkar a ni chunga manto taka sorkarin buhfai a lei hi tullo a mipui sum tamtak khawhralna ani a. Tuten emaw lo hlawkpui viau mah se, Ram sum dinhmun harsat zia ngaihtuaha man tlawm zawka lei ngei turin Mizoram sorkar ka ngen a ni,” a ti.
