36th National Sub-Junior Taekwondo Championship, Cuttuck, Odhisa a ni 25 – 27 March 2023 chhunga khelh zawh takah Mizoram Sub-Junior Team ten Silver 1 leh Bronze 2 an la.
Laltlanmawia, MZU Taekwondo Club, KYORUGI Silver Medalist.
Medal lakna hi Kyorugi leh Poomsae inelnaah te a ni a. Silver medal hi MZU Taekwondo Club zirlai Laltlanmawia niin Under 29kg category atanga a pet chhuah a ni a, Poomsae inelnaah Arella Roluahpuii leh Joshua Lalthlangdika ten Bronze medal 2 an hlawh chhuak bawk.
Mizoram Best Fighter 2022, MZU Campus naupang Tlanmawia hian a match hmasa ber bye-in Second round atangin match bul atan a. Puducherry tumin a khel tha nghal hle a, 13-1 a an inthlauh avangin point Gap hmangin a chak nghal a ni. A match hnihna Quarter Final match-ah Tamil Nadu tumin deciding khelh hial ngaiin an in hneh tawk a. Point 13-7, 15-21-a an inhneh tawk hnuah 18-25 in a hneh hram a, semi final a lut a. Semi-Final-ah hian Chhatisgarh Champion nen intumin game pawh a tang hle. Mahse Tlanmawia hi khawng taka tang tluanin 6-4, 8-6 in round a lak ve ve avangin final kan lut ta zawk a ni. Finalah hian Bihar Champion nen insuin round an in lak chhawk a, 14-5 in Bihar-in a lak hnuah Tlanmawian 2-7 in a la ve thung a, deciding round-ah hian Tlanmawia chesualin a vanduai zawkah a tang a, 19-11 in Bihar lakah a chak zo ta lova, Silver a la ta a ni.
Arella Roluahpuii, Gidae Taekwondo Club, Female Individual leh Poomase Pair Bronze Medalist.
Poomsae Inelnaah Female Individual category-a khel Arella Roluahpuii, Gidae TC/Venghnuai chuan Bronze medal a hlawh chhuak a. Pair inelnaah Joshua Lalthlangdika, Exodus School Taekwondo Club/Chaltlang nena tang dunin Bronze Medal an hlawhchhuak bawk.
In khel dangah Under 41kg-a khel Zaihruaimawii(Mission Vengthlang/GidaeTC) chuan Manipur hneh lovin Quarter Finalah a tawp a, Lalhruaitluanga Under 27 kg (MZU TC) pawh a tumpui Odhisa pal tlang zo lovin a zin kawng a ti tawp bawk.
Joshua Lalthlangdika, Exodus School Taekwondo Club, Poomsae Pair Bronze Medalist
Mizoram Team hi Vanlalmawipuian a hruai a, Mizoram team-te hian March ni 28, 2023 hian Cuttuck an rawn chhuahsan leh nghal ang a. March ni 29-31, 2023 chhunga MATA Halla buatsaih tur 17th Mizoram Open Taekwondo Championship khel leh hmanin an rawn thleng ang.
Medalist te:
1. Laltlanmawia Under 29kg MZU TC/MZU Campus Silver
2. Arella Roluahpuii Individual Poomsae Gidae TC/Venghnuai Bronze
3. Joshua Lalthlangdika Pair Poomsae Exodus School TC/Chaltlang Bronze
4. Arella Rouahpuii Pair Poomsae Gidae TC/Venghnuai Bronze
