Vawiin June ni 29, 2023 (Ningani) khan Mizo National Youth Front(MNYF), Kolasib Block buaitsaihin Kolasib Block Conference neih a ni a. He hun hi khuallian Dr. L Thangmawia, MLA leh uaptu Minister K Lalrinliana, Kolasib bialtu MLA ni bawk te chuan an hmanpui a.
He huna Khuallian Dr. L.Thangmawia chuan thu sawiin, Mizoram tâna din political party tam tak an awm tawh a, Mizo hnam tâna din awm chhun erawh MNF party chauh a ni, a ti a. India rama political party tam takin kum 60 pawh an tlin theih loh laia MNF kan tlin theih chhan bik hi eng vang nge kan tih chuan chapona tur a awm lo a. MNF-ah hian mi fel lo tam tak pawh kan awm ang, mi tha tak tak pawh kan awm ang. Kan tling lo chung chungin Pathianin min kaihruai a, vawiin min hruai thleng a ni, a ti.
Pathianin hruaitu ropui tak tak min pe a. Pu Laldenga kan hria a, kan ram leh hnam tâna a beih nasatzia pawh kan hria ang. Tunah Pu Zoramthanga min pe leh a, hruaitu ṭha chuan vision ṭha a nei tur a ni. Leader ṭha ni tur chuan mi ho khawm thiam nih a ngai leh a. Party dang aṭanga hruaitu lawk apiang la lut thei hruaitu ni thei hi an vang a, Mizorama kan politician tam zawk hian hemi kawngah hian Pu Zoramthanga hi an hrechiang a. An hriatchian avànga party hran aṭanga rawn lûta amah rawn zui thei an ni, a ti.
He hunah hian Pu K Lalrinliana, Kolasib bialtu Minister chuan mi thar 144 lai a lawmlut a. Bialtu Minister chuan thu sawiin, MNF party ka zawm tirh khan ka thutlûkna siam chhan ber chu ram tâna theihtawp chhuaha nunna hlan huamte an nih vang a ni, a ti a. Kan ram tana beitu leh nunna hlantute’n ram tâna an lo beih tawhna zawng zawng kha keini ho hian a thlawnin kan luan raltir tur a ni lo a. Pathian leh kan ram tan titu kan nih hi kan ngaih pawimawh a ngai a ni, tiin kalkhawm te a chah bawk a ni.
