Vawiin June ni 16, 2023 (Zirtawpni) hian Golden Hall, Congress Bhawan-ah Friday Political Session hun hman a ni a. He hun hi MPCC Treasurer Dr. Lalmalsawma Nghak-a’n a kaihruai a. MPCC President Lalsawta leh MPCC Fronline Chairman te leh President te’n thu an sawi.
MPCC President Lalsawta chuan, Mizoram tana sorkar tha siam turin kan rinchhan chu Pathian a ni, tih sawiin, Ama lam kan en a, Amah nen chuan theihna kan nei a, kan zam reng reng lo. Pathianin hna a thawh miau chuan tawngtaia dil phak pawha kan ngaih loh thleng in min chhang a. Sorkar turin kan inbuatsaih a, kan sorkar dawn a ni, a ti.
Lalsawta chuan, MLA candidate nih avanga thisena in zawmna pawh nei si loa, ka ni, ka pate, in inah chaw ka lo ei dawn, tih thar chiam hi hlauhawm a ni a, hetiang hun a liam tawh a, bansan a hun, tih sawiin, Kan ram ti danglam thei tu leh kan duh ang min duhpuitu te nen ram kan siam tha turin theihtawpin kan chhuah a ṭul zawk a ni, a ti.
Kumin inthlan hi thusawi thiam leh haw haw inthlanna a ni lo. Thusawi thiam leh in fakmawi chiam hi hlimawm mah se, nun bengchheng, thusawi hriat theih loh a nih chuan awmzia a awm loh thu sawiin Pu Sawta chuan, kan thu sawi ni lo, kan nun hian thu a sawi zawk tur a ni. Mipui in ang, ram leilung in ang, enkawl dan a in an loh avanga dinhmun inthlau tak an awm. Dik tak leh fel taka ram leh mipui enkawl thiam apiang an ding chhuak mai thin. Kan hnam leh kan sakhua himna turin Mizoram tan Congress Party kan sorkar dawn a. MPCC Treasurer aṭanga chawl ta Pu Zodintluanga chuan Congress Party tan nasa takin hna a thawk a mithar duhawm tak tak a lawmlut ṭeuh. Pu Lalrindika Ralte, kan MLA chungah Hachhek bial mipuiten rinna an nghat mek a. Pu KT Rokhaw, kan MLA pawhin a bialte tan a thawhhlawk em em. Heng kan ṭanrualna avang hian Congress Party hi kan sorkar dawn a ni, a ti bawk.
Dr. Lallianchhunga, Chairman, Media Department, MPCC chuan, Congress party chu Mizoram mipuite tana beiseina pe thintu a nih thu sawiin, MNF in Mizo Nationalism hmangin India sorkar an kap a, a nghawng leh sawhkhawk rapthlak zia chu tun thlengin a la reh lo. Kha hun thim taka Mizoram khai chhuaka beiseina pe tu chu Congress Party a ni a. Tuna thlamuang tak, remna leh muanna neia hmalam kan pan theih chhan hi Congress Party vang a nih thu sawiin, 2008 atanga 2018 kha Mizoramin sorkarna a neih tawh zawng zawnga sorkar tha bera ngaih a ni a. Kha sorkar aia tha zawk kha tunah hian Mizoram kan pe leh dawn. Mizoram mipuite tan kan inhlan ral dawn a ni, a ti.
MPCC Spokeperson Dr. Lallianchhunga chuan, ZPM ah mi tam tak an beidawng ṭan a. Congress party chuan Mizoram mipui beiseina thar kan pe dawn a. Miretheite khaichhuak turin Congress Party chuan theihtawp a chhuah dawn a ni, a ti.
MPCC Media Department Chairman chuan, MNF in ram hruaina hna an thawk a. Mizoram beiseina bo thak khawpin ram an hruai ṭhin a. Mizoram chanchina Mizoram Kuthnathawktuten sorkar kawng an zawh khum hmasak ber an ni, tih sawiin, Thluaka sum lut leh mipuite leiba ti pung reng chungin Nationalism an sawi a, Mizo Nationalism sawi reng chunga damlo te bill a bat sak te, Sorkar hnathawk hlawh batsaktute leh Hindutva kalpuitute nena in thlun zawm hi ram tana him lo, tih sawiin, Kristian te thlavang hauh ngam Chief Mnister leh mi kutfai kan mamawh a ni, a ti bawk.
MAHILA President Vanlalawmpuii Chawngthu chuan, Politics leh party kan zawm chhan chu ram leh hnam tan a ni tur a ni a, chutiang ngaihtuah loa Political Party-a lut te pawhin chutiang rilru pu turin ka ngen che u, tih sawiin, Contract hna leh sorkar hna kan duh ang kan hmuh loh avanga vui ve mai mai thei kan ni lo. Congress sorkar laia kan duh anga hamthatna mimalin kan neih hlawhtlin loh chhan tam tak chu ram leh hnam tana kan hotuten an duh vang a ni. A tling leh a tha ramin kan neiha an tling ten hna an thawh an duh vang a ni. MNF sorkarah mithiam leh theihna nei tan hmun a awm lo. Duhsaktu nei lo thalaite tan an thiamna hmanga an inelna in awmzia a nei lo, a ti.
Vanlalawmpuii chuan, Mizoramin Vote thlak uluk a ngai, vote thlak kan uluk loh avangin kum nga chhung awmze nei lovin kan awm a, kan ram hmalam tur thui tak a hril a ni. Sorkar hnathawk hlawh lak theih loh, dan leh hrai mumal loh chhan hi Vote thlak kan uluk loh vang a ni. Mi duham leh hlemhle roreltu kan neih lohna turin rilru fim tak pu in Vote hmangin danglamna kan siam a ngai, a ti bawk.
C. Lalhriatpuia, Chairman, Social Media Department MPCC chuan, Congress Party ni lo, midang kuta ram rorelna a awmin Mizoram a him lo thin a. Congress-in ro a rel loh chuan Mizoramah hlemhletna a hluar a, dik lo taka hnathawktu lak a hluar a, ram a ralmuang thei lo a, sum leh pai harsatna nasa tak a thleng thin, a ti. State hlim berah min thlang ve thin mah se, kan NUIH nachhan hi kan lungawi vang ni lovin mangan nuih a ni. Chuvangin, Mizoram a remna leh muanna a thlen theih nana lalthutthleng kiantu, remna siamtu Congress Party bawk hi Mizoram tan kan tho leh dawn a, Mizoram hi kan hruaichhuak leh dawn a ni, a ti.
MPYCC President Laltawnliana chuan, kum tawpah kan inthlang dawn a. He inthlan hi hnam leh sakhua himna tur thui tak hriltu a ni a. Thlarau indona a ni. Hmun hrangah Kristian te nekchepin an awm a. Mizo tam takin harsatna an tawk. Kristian sakhua nepchepna thiat turin Central leh Mizoramah Congress a sorkar a ngai a. Christian nepchheptu BJP sangawizawnpui tu nih hi ram hmelma a ni. India rama hnam tenau zawk te leh sakhaw hrang hrang te humhim turin India ramah Congress thlipui a tleh mek a, Mizoramah pawh kan sorkar dawn a ni, a ti bawk.
NSUI (Mz) President Pu RB Lalmalsawma chuan, Congress Party hian mipui te duhsakna kawngah lai takin a kal thin. Chu chu Congress Party a nghet taka ka awm chhan a ni. Tunah hian Congress party sorkar hi Central leh Mizoramah min nghak a, min au a ni, a tih sawiin, Mizoramin Sorkar tha kan duh a, kan tuihal a, Lalsawta ho hian dik leh fel takin, Mizoram hi Sorkar tha kan pe dawn a. Ram leh hnam tana sorkar tha siam turin Mizoram mipui Congress Party zawm zel turin ka sawm che u ani, a ti.
