Vawiin July 21, 2025 Thawhtanni hian Congress Bhavan-ah MPCC Political session neih a ni a. He hunah hian C. Lalhriatpuia, Secretary, MPCC chuan thu sawiin, thalaite chu Mizoram tana THANGTHAR POLITICS tha zawk siam tura tanrualpui atan a sawm.
C. Lalhriatpuia chuan Mizoram politics dinhmun a chhe tial tial ni a sawiin, “Ram hruaituten mipui min bum thin hi a pawiin, a thinrim thlak takzet. SEDP hmanga chhungkaw tinte cheng nuai 3 min tiamtuten chhungkaw tlemte hnenah Rs. 25,000/- an pe thei hram a. Mizoram hmangaih ber ang maia Nationalism aupui thin tute chu sorkar an kalpui tawh dan enin Mizoram tichhe tur hrim hrima din ang mai an ni a. Mizoram hmasawnna tur Project lian pui pui an ti thuannawp vek duh hial a. An opposition lai chiahin Nationalism an tuipui a, an sorkar veleh an theihnghilh leh daih thin,” a ti.
“Mipuiin beiseina sang tak nena MNF thlak tura kan thlan tlin ZPM sorkar chu beidawnna khur thuk zawka Mizoram mipuite hnuk luttu mai an ni ta zawk a. Kan ti ang an tihte an la ti hman lo hi chu hun an la ngah a, a hriatthiam theih; kan ti ve lovang an tihte an ti leh vek si hi chu engti kawng maha hriatthiam theih a ni lo. Kum 15 daih kawngpui min tiam lai leh road tax min chawi double tir lai a kawng chhiat lutuk vanga mipuiin harsatna namen lo kan tawk ta maite hi a mak a. Kohhran behchhana Politics khelh pawh pawisa lo ZPM unaute hian Pathian pawi an sawi nasa ta deuh em ni a tih theih. Tin, an MLA zinga thalai viak tha zawkte hi hmang tangkai duh se chu heti hni hne hi an nih a rinawm loh,” a ti bawk.
C. Lalhriatpuia chuan, “Mizoram-ah thalai kum 45 hnuai lam vote nuai 5 chuang awmin, vote awm zawng zawng zat atanga 60% a ni daih a. Chuvangin, thalaite kan tanrual a, siamthat tumna taka tak nena hma kan lak ngam chuan Mizoram hi kan la siamtha thei chiang a ni. Siamthat duh tak takna rilru pu hi kan la tam tawk a, beidawnna tur a la awm lo. Thalaite hian hruaitu tha lo, mipui min bum thintute, corrupt lutukte hi beiin na takin hnawl ila, ram rorelna tha zawk, THANGTHAR POLITICS, corruption leh nepotism in a tih buai ve loh, sorkar huaisen leh dik, sorkar chak leh lang tlang siam turin i penchhuak ang u. Kan tanrual phawt chuan Thalaite hian Zoram tha zawk kan siam ngei ang,” a ti bawk.
