Vawiin ni 25.11.2022 (Zirtawpni) khan Golden Hall, Congress Bhawan-ah MPCC Friday Political Session hun hman a ni a. He hun hi Dr. Henry Zodinliana Pachuau President, AIPC in a kaihruai a. Prof. Lalhriatpuii, Head, Department of Economics, Mizoram University chuan “Mizoram thingtlang retheihna: Kan dinhmun leh hmalak dan tur. Multi-Dimensional Poverty Index atanga thlirna” tih hmangin powerpoint Presentation hun a hmang a, C. Lalhlimpuia, Gen. Secy, MPCC in PACS zirchianga President hoa zinna report a pe bawk.
Lalhriatpuii chuan, Khawvel ram hrang hrangten an ram retheihna an ngaipawimawh theuh a, engtiang taka rethei nge an nih an zirchiang thin, an zirchianna behchhan chuanin ram chhunga retheihna umbo nana hmalak dan tur an duang thin a ni. India ram pawhin tehfung hrang hrang hmangin kan ram retheihna a zir chiang thin, tih sawiin, a tlangpuiin heng zirchianna te hi tehfung khat (single dimension) hmanga zirchian a ni. Tehfung khat chauh hian retheite retheih dan chen a tarlang zo lo fova; an dinhmun chawikan nana ruahmanna siam nan a felhlelin, a sawi tum tak a sawi thelh theih a ni, a ti.
Prof. Lalhriatpuii chuan zirchianna hrang hrang hmanga retheihna umbo tura hmalak dan kawng hrang hrang sawiin, thingtlang retheihna tiziaawm turin Multi-dimentional Poverty Index (MPI) retheite retheihna hriatsak a, chung an retheihna zawn theuha dinhmun ziaawma an awm theihna tura hmalak dan turte, Centrally Sponsored Schemes (CSS) te tun aia changtlung zawka kalpui leh zirna tihhmasawn, taksa tana chakna pai thil tha zawk an dawn theih nana hmalak te bakah buh, rrtui, alu, vaimim thar chhuah tam a tul tih sawiin, zirchianna leh Data rintlak neih a pawimawh, a ti bawk.
MPCC President Lalsawta chuan mithiamte atanga ram inrelbawlna tur kawng inkawhhmuh chu thil hlawk leh tul tak a ni a. Mithiamten ram tana an thiamna leh theihna tangkai taka an hmang thin chu lawmawm a ti a. Congress Party in sorkarna siam tuma hma a lak chhoh danah mithiamte thurawn atangkai zia sawiin, tum thuhmun neih chuan nasa takin kawngro a su dawn a ni tih sawiin, ram siamthatna kawnga thurawn engpawh dawngsawng turin Congress party chu a in peih reng a, lawm takin kan dawngsawng zel ang, a ti. a, C. Chawngkunga pawhin ram inrelbawlna leh ei leh bar kawnga intodelh tura kalphung mumal leh rintlak, zirchianna dik tak nena hmalak a tul thu a sawi bawk.
