PC party chuan thuchhuah siamin, “Mizorama Electric bill pung zel ngaimawhna nei pha lo P&E Minister Pu R.Lalzirliana kan hrawn hi PC Party chuan a vanduaithlak kan tiin, mipuite phurrit tibelhchhahtu maiah kan ngai,” an ti.
Thuchhuahah chuan, “April ni 23, 2022 – a MNF Hnam Rûn a P& E Minister Pu R.Lalzirliana’n “Political Party pakhat Electric bill pung tam tia phun phuna sawiseltute khan an zuk en chian meuh chuan a punna a tam lo tih an zuk hmu” tih thu a sawi chhuak khan, mipuite phurrit chhâwk zangkhaina tura electric bill pung a tlem emaw a tam emaw tihhniam tuma vei na a neih lohzia a tilang chiang hle ah PC Party chuan kan ngai.
“State dangte’n an khua leh tuite hmakhua ngaia an electric bill a hniam thei ang ber te, a thlawn deuh thaw te a an tihsak theih tawh lai a kum 30 chuang State puitling kan nih tawh hnu pawh a Mizorama Electric bill tihhniam a nih thu P&E Minister in a la puang ve thei lo chauh pawh ni lova , Electric bill punna zawk chungchang thu hmanga mipuite min la chungtlak fo mai hi Zoram mipuite thamlohna lian takah PC Party chuan kan ngai a, a thanatthlak kan ti takzet.
“Hemi ni veka P&E Minister in 400 mg pe chhuak thei tur Chhimtuipui ( Kolodyne) ngaihtuahna senga hma lak mek anih thu a sawi pawh hi a lawmawm kan tih hle rualin MNF kum 10 chuang an sawrkar tawh hnu pawh a kawlphethaa intodelhna tura ngaihtuahna sen ringawt hmanga hmalakna, a taka a hlawhtlinna hmel hmuh tur awm chuang si lo hi chu Zoram mipuiin khamawm kan ti tawh tih lo hre turin Minister Pu R.Lalzirliana kan chah a.
“P&E Minister hian ngaihtuahna senga hmalak mek a nih thu chauha mipuite min hnem tum lo hian , ‘hna thawh zawh anih tawh thu” emaw ‘ thawh mek anih thu ” emaw tal hian Zoram mipuite min hnem a hun hle tawh zawk tih min lo hriat sak se PC Party chuan kan duh a ni,” an to bawk.
