Mizoramah Aam Aadmi Party-in kalphungthara kal tum

Aizawl May 16, 2022 : Mizoramah Political party thar, Aam Aadmi Party din chungchangah AAP hruaitute chuan Aizawlah thuthar thehdarhtute kawmin, AAP sorkarna state dangte anga kalphung tha lakluh an duh thu leh mahni hlawkna um tumte tan an party ah hmun a awm loh thu an sawi.
AAP te hian vawiin khan AAP Northeast Region incharge, Rajesh Sharma hoin Aizawl Press Club-ah chanchinthar lakhawmtute kawmin he thu hi an sawi a, an party chuan midang sawi chhiat an tum loh thu leh an theih ang kawnga ram siam that chu an tum ber a nih thu an sawi a, AAP in Punjab leh Delhi ah kalphung tha tak kalpuiin, mi rethei chawikan kawngah leh ram tih hmasawn kawngah hmuh theih leh hriat theiha an hruaituten an kalpui ang chu Mizorama lakluh ve an duh an ti a, ram siam that nana thawk chhuak turin Mizoram mipuite an sawm tih sawiin, hetih lai hian mahni hlawkna um tumte tan an party ah hmun a awm loh thu an sawi bawk.
AAP Mizoram te chuan tun dinhmunah office bearer pawh an la nei lo tih an sawi a, centre lama an hotuten thla khat vel hun an pek chhungin member atan ram vei leh ram siam tha duh mi an zawng dawn tih an sawi.
Zawhna chhangin AAP Mizoram hruaitute chuan nakum MLA inthlan zawh ah pawh an kalphung ngaia Party nghet taka kalzel an tum tih an sawi a ni.