MNF Adviser Dr.R.Lalthangliana tuna Mara Autonomous District Council (MADC) inthlanna neih tura campaign nei mek chuan nimin chawhnu khan Amobyu Centenary Community Hall, Theiri khua, Tisi khua, Zyhno (Zawngling), Tipa B (Tuipang ‘L’)-te a tlawh a. Tukin leh vawiin April, ni 28, 2022 (Ningani) zing leh chhunah, Tipa-V (Tuipang Centenary) Square, Saikao (Serkawr), Kawlchaw bazar, Thiahra (phalhrang), Amotla (Rawmibawk), Riasika leh Tipi Ferry-te a tlawh a.
MNF Adviser Dr.R.Lalthangliana, Minister ni bawk chuan heng hmun hrang hrangahte hian thusawiin, “State sorkarin Council Area-ah kan sangawi zawnpuite an sorkar chuan department hrang hranga hmalaknate dawhkan khatah kan kilpui thei dawn a, kan duh tak kan fahrinte an sorkar chuan a enkawl dan a danglam bik hle dawn a ni. Siaha District-ah hian thil tam tak tih tur hmachhawp a awm a, project chi hrang hrang thawh turah state sorkarin kan tum ve tur ( state matching share) pawh kan Chief Minister zahawm tak Pu Zoramthanga hova kan tih theihna tur chuan tuna kan candidate-te in tihtlin a ngai a, hmasawnna danglam tak in hmu dawn a, kan duhzawng tak in tih chuan in duhzawng tihsak che u hi kan bat ve a ni tih kan hria. MNF candidate in vote chuan keimah leh Pu Zoramthanga sorkar in vote tihna a ni ang,” a ti.
“Congress leh ZPM hi ka sawisel hran lo, mahse, ka hmuh dan chuan congress party an tla tluang hle zel a, tun hnaia state 5 inthlanah an tla fai vek a. Central lamah an hniam rawih rawih a, an tla zar zar zel a, Mizoramah pawh sorkar tur chuan beisei ngaihna a la awm lo. ZPM pawh party mumal lo, tin ruak khawn rik ang chauh an ni a, a chhungah engmah a awm lova, beisei tur awm reng reng lo a ni, social media leh a phaw vuakah an inpho nasa vel mai mai ringawt a, thawm chang an ti na a, a chhungah an kawrawng hle a ni. Chuvangin, nakum kum tawp inthlanpuia state-a sorkarna siam leh mai tur MNF-ten kan thawhpui theih tur MNF MDC candidate-te hi lo thlangtling ngei ngei ang che u,” MNF Adviser chuan a ti bawk.
Commerce & Industry Minister ni bawk Dr.R.Lalthangliana chuan border trade chungchang hmalakna sawiin, “Myanmar nen kan ramri lam hmalak kan tum hi chu tunhnai Myanmar politics buai avangin hma kan la hlei thei rih lo a; Bangladesh lamah erawh chak takin hma kan la mek thung a, Bangladesh lam hian km. khat chiah kawng laih an rawn hmabak tawh a ni.Tun hnaia Bangladesh nen insumdawntawnna kan hlawhtling chho tan dawn ta hi, Mizoram pum tan malsawmna a nih rualin Mizoram chhim lam tan hian malsawmna a ni leh zual dawn a, District Council area-a chengte hi a chhawr tur in ni ang,” a ti bawk.
