Marpara, 29/11/2022: A bial fang mek Zodintluanga chuan New Sachan leh Marpara khua-ah te thu sawiin, “Kum li kal ta chhung khan Chief Minister thusawi engmah tih hlawhtlin a awm lo a,” a ti a. Congress sorkar laiin Mizoramin hmasawnna hmel nasa tak a hmuh thin thu a sawi a, a tluk a awm ngai lo a ti bawk.
CLP Leader Zodintluanga chuan, “Mau/Raw chin duh zawk vanga IAS hna bansan an la awm lo mai ni lovin, tun kum li chhung hian Mau/Raw hmun nei thar leh tuipui thar pawh an awm hriat a nilo a. ‘Aizawl chu traffic jam awm lohna khawpuiah kan siam dawn e,’ a ti a. COVID-19 hri len vanga Lockdown puan a nih lai kha Traffic jam awm lohna khawpui kan nih teuh ber lai a ni. Congress Sorkarin a Aizawl khawpui mil tawk two wheeler tax permit kan pek laiin, MNF sorkar chuan eizawnnaa hmangtute dinhmun en lovin a sang tel permit an pe a ni,” a ti.
“MNF sorkarin hmasawnna ruhrel a hluihhlawn tawh tam tak zingah Tuirial HEP pawh Congress Sorkarin a din tha leh vek a. Falkawn Referral Hospital ar vulhna atan te-a an hman mai mai tawh pawh, Medical College hialah a hlangkai a. Sport lamah hmasawnna nasa tak a thlen bawk a ni,” Zodintluanga chuan a ti a. Chutih laiin tih dik tawk loh pawh tam tak kan nei ve thei a, chung kan thil tih dik tawk loah te chuan Mizoram mipui hnenah ngaihdam ka dil a ni, a ti bawk.
CM thusawi a hlawhtling thei lo chu beidawn thlak a tling tawh tih sawiin, Zodintluanga MLA chuan, “Kawng chhawng leh lei verh pawh kan Chief Minister hian a tuipui hle a, kan CM suangtuahna mipui hmaa a puan chhuah zung zung ang hi hlawhtling nghal zel thei se chuan Mizoram hi nasa taka hma kan sawn theih a rinawm. Chief Minister ber thusawi engmah tih hlawhtlin a la awm lo hi a beidawn thlak hle a ni,” a ti.
Zodintluanga chuan a bial chhungah hmasawnna kawng hrang hranga an hmuh chhoh mek laiin, tun kum kalta chhung hian MNF sorkar atangin hmasawnna hmuh tur pakhatmah a awm loh thu a sawi a. Tuisenchhuaha MNF mi leh sa ten Health Sub-Centre cheng nuai sarih senga ban kar kat chauh an sak zawm phei chu a taka hmuh a zahthlakin rilru a na hle a ni, a ti bawk.
Zodintluanga chuan a bial chhungkaw tam zawkah NLUP dawng lo an awm loh thu sawiin, “MNF Sorkarah hi chuan thingtlang khaw kilkhawr zawk chu sawi loh, khawpui zawlah pawh MNF sorkar hnua hmasawnna hmel hmuh tur a awm meuh lo. PMAY hmanga miharsate in sakna tur kum li kal ta a kan thehluh kha tun hnaiah a lo chhuak chauh a. Congress sorkar lai chuan kum tin in sak thar tur kan thlang thin. PMAY hi Congress sorkarin kan duan Central-in an ‘approve’ vek tawh a ni a, tuman an ti danglam thei lo, Congress nih vanga MNF-in an la lo a nih chuan min hrilh ula hma kan lo la ang,” tiin a sawi.
MPCC Treasurer & Thorang bialtu MLA Zodintluanga chuan, “Nimin Thawhtanni-ah MNF-in ‘Marpara-ah mi 350 kan lawm lut a, Zodintluanga chu a bial mipui hmuaktu pawh an awm lo’ an ti a, dawt hmanga mipui bum hi an hotupa ber atanga an zir chhuah a ni a, an in hmeh viau e,” a ti.
“He biala ka din tirh chuan inkalpawhna, eng leh tui thianghlim in tur thlengin a chhia-in a harsa hle a nih kha, vawiinah chuan ka bial khua zawng zawng motor a lut thei a, eng leh tui thianghlim in tur thlengin hma kan sawn zia kan hria a. Tun kum li MNF sorkar chhunga kan bial chhung an ngaihthah zia, kan hre vek a, he bial leh Mizoram tan hian Congress hi a sorkar leh vat a ngai. Mirethei thleng phak budget siam thiam, mipui rawk ching nilo kan sorkar ngei dawn bawk a ni,” a ti bawk.
MPCC Treasurer leh Thorang bialtu MLA Zodintluanga hi MPCC Secretary Lallianzuala Khenglawt, HC Zothanpara, bakah C. Lalhmachhuana ten an tawiawm a ni. Thawhlehni kalta atang khan a bial khaw 21a fang a, bial fan round one hi vawiinah a zo fel a ni.
