Kuminah tunhnai thla 5 chhungin Dengue vei hmuhchhuah a pung chho chak hle a, tun thla hnih kalta phei chuan 100 chuang ve ve hmuh a ni.
State Vector Borne Disease Control Programme (SVBDCP) Directorate of Health Services chhinchhiah danin, kumin Dengue vei hmuhchhuah mi 437 an awm tawh a, January (6), February (7), March (4), April (nil) leh May (1) ah sawi tham hmuhchhuah awm loin, June (13) atangin a pung chho chak a; July (20) leh August (84) hnu, September (159) leh October (143) ah te chuan za a chuang ve ve tawh a, October ah phei chuan mi pahnihin nunna an chan phah hial tawh a ni.
Dengue hi kum 2019 vel atang khan Mizoramah kumtin hmuhchhuah a ni tawh a, 2019 (131), 2020 (67) leh 2021 (83) hmuh a ni a, kuminah pung chho hluaiin October thleng khan 437 hmuh a ni tawh.
‘Mizoramah Dengue natna hi Malaria tlukin mi tam takin kan la hmelhriat loh natna a ni a. Khawvel changkang chho zelin a kentel, mipui zin veivak pung leh ram leh ram intlawhpawhna tha avangin Mizoramah pawh Dengue vei kan pung ve zel a. Khawvel hmun hrang hrangah Dengue hi natna hluar chak ber zing ami niin, Mizoramah pawh tunhnaiah Dengue natna vei an pung chho mek a, Aizawl district leh Lunglei district-ah a hluar bik,’ SVBDCP thuchhuak chuan a ti. Natna pung chak tak a nih avangin inven kawngah tan lak reng loh chuan Malaria tluk zeta buaipui awm a nih mai a hlauhawm tih a sawi a ni.
