Mizoramah khuai chi thar pathum hmuchhuak

Mizoramah khuaitê (stingless bee) chi li (4) an awm tih hriatchian zinga pathum (3) chu khawvel hmundanga awm ve lo, species thar a ni tih tunhnaiah hmuhchhuah a ni.
College of Horticulture Central Agricultural University (Imphal), Thenzawl Mizoram chuan India hmarchhaka khuaite chi thar pali, Lepidotrigona thlah vek an hmuchhuak thar a. Heng zinga pathum hi Thenzawla hmuhchhuah niin pakhat chu Mamley, Sikkim-a hmuhchhuah a ni.
Thenzawla khuaite hmuhchhuah thar pathum hi an hmingah – Lepidotrigona thenzawlensis sp.n., Lepidotrigona rajithae sp.n. leh Lepidotrigona amruthae sp.n. tia vuah niin, Sikkim-a an hmuhchhuah hi Lepidotrigona sikkimensis spn.n tiin a hmuchhuak tu Dr. Rojeet Thangjam hian an hming a phuah.
Heng khuaite hmuchhuaktu hi Department of Entomology College of Horticulture, CAU Thenzawla assistant professor Dr Rojeet Thangjam a ni a, kum 2019 atang khan Department of Entomology UAS, GKVK Bengaluru Biosystematic Laboratory-a emeritus scientist Dr Shashidhar Viraktamath nen khuaite hi hriatfiah an nih theih nan hian hma an la tan tawh a ni.
Water trap hmangin khuaitê pa leh nu Mizoram leh Sikkim amite manin, uluk taka an enfiah hnu ah India rama khuaitê dangte nen an inang lo tih an hmuchhuak a. Zirchianna nasa zawk an neih hnuah khuaitê chi li chu species dangte nen an danglam tih an finfiah a ni.
‘Lepidotrigona’ hi North East region ah chauh an awm a, a hma pawhin species chi khat – L. ardifera chu Sikkim-ah chauh a awm tih an hmuchhuak tawh bawk. Tuna an hmuhchuah leh nen Lepidotrigona species India rama an hmuhchuah chu panga a ni ta a ni.
Lepidotrigona species pali an hmuhchuah thar chungchang 2022 August 15 khan ‘ZOOTAXA’ journal-ah tihchhuah niin, impact factor 1.091 a nei a ni.
Commercial-a khawvelin khawizu nei chi a hmelhriatte chu – Khawipui, Khawivah leh Khawitê an ni a. Khawitê hi ramdangah chuan an khawi uarin, a chawtha ken (nutritive value) a sàn zawk vang leh lakkhawm tam a harsat zawk vangin a man a to hle.
Khawitê hi pollinator tha tak a ni a. An pumrua a tet em vang hian khuai dangin an luhchhuah theih loh thil pârte pawh an luhchhuah a, an pollinate zung zung thei, tih chu khuai lam chanchin zirmite sawi dan a ni a. Ramdang atanga lakluh ngai lo, kan ramin potential a neih, kan khawitê neihte chhawr tangkai lamah hmasawnna tur tam tak a awm nia an hmuh thu an sawi.