Aizawl, April 1 : Oil Palm rah hralhna man bithliahtu committee “Price Fixation Committee on Oil Palm Fresh Fruit Bunches chu vawin chhun dar 12:00 khan Secretariat Conference Hall, MINECO-ah an thukhawm.
He meeting hi Pu J.Hmingthanmawia, Secretary, Agriculture Department chuan a kaihruai a. District hrang hrang atanga Oil Palm chingtu aiawhte’n harsatna hrang hrang an tawh te leh Oil Palm rah hralhna rate hman mek kg khatah Rs.5.50 chu tihsan hun hle a an hriat tawh thu an sawi. Oil Palm rah leitu Company atangin Godrej Agrovet Ltd. leh Ruchi Soya Industries Ltd. ten Oil Palm rah an lei chung changa harsatna an tawh te an sawi bawk a. Meeting chuan Oil Palm rah hralhna rate hman mek chu vawin April Ni khat atanga hman tan turin kg khatah Rs.10 a tihsan nise an ti. Tuna rate thar hi India sorkar-in viability price a kalpui hma a hman tura tih a ni.
Mizoramah Oil Palm hi a tha duh hle a, nikum 2021-2022 chhung khan khaw 111 atangin Oil Palm chingtuten company te hnenah Oil Palm rah metric tonne 5254 ( Rs 289,00,000 – cheng nuai zahnih sawmriat pakua man) an hralh a ni. Rate thar hman anih hnu hian Oil Palm rah tharchhuah pawh nasa taka a pun phah beisei a ni.
He meeting-ah hian District hrang hranga Oil Palm chingtu aiawh, company aiawh leh state sorkar aiawh in Agriculture Department leh Finance Department aiawh te an tel a ni.
