Vawiin December 13, 2022 (Thawhlehni) chhun dar 12:00 khàn PC Party Office Treasury Square-ah Lalrinzuala Chawngthu Sr.Vice President chuan India rama rorelna in sànga Uniform Civil Code (UCC) Pass tàk, Mizorama hman ve PC Party-in engtikawng maha rem a tih dawn loh thu a sawi.
Lalrinzuala Chawngthu chuan, “Tun hnaia Rajya Sabha-in ‘The Uniform Civil Code in India, 2020 Bill eptu Party: TMC, MDMK, RJD, SP, CPI (M), NCP, leh Congress ten nasa taka an dodal na kara BJP leh a thawhpuiten tam hneha an pass tlang ta mai kha a pawiin India ram pum tàn a him lo hle a ni,” a ti a.
Lalrinzuala Chawngthu chuan, ”He UCC hi India ram puma hman tura duana Pass ni tawh mah se India danpui Article 371G – a Special Provision kan neih avangin Mizoramah hmang lo turin kan ti thei tih sawiin Pu Rina chuan, ”He Article 371G hi kum 1986-a India danpui siam ?hat vawi 53-naah (53rd Constitutional Amendment Act, 1986) Mizoram bik tan India danpuia telh niin, Mizote sakhua leh khawtlang nunphungah te, kan customary law hman thu-ah te, kan customary law hnuaia inawpna leh rorelna kan kalpui danah te leh kan leilung mi dang kuta hlan chungchangah te Mizoram State Assembly remtihna tel lo chuan Mizorama hman theih a nih loh tur thu a chuang a ni,” a ti.
PC Sr. Vice President cbuan, ”He UCC hian hengte hi a thiah theih dawn avangin Mizorama hman ve kan duh lo a. India danpui hnuaia inziah luh remtih avanga inremna ziaktu, zalenna suala rammu tawhte sawrkarna chelh lai tak a ni hi Mizoram sawrkar tan hma lak a remchang hle a ni. Chuvangin, UCC hi India ram puma hman tura tih a nih hun a thleng a nih pawhin India danpui hnuaia humhalh bik kan nihna lai tanchhana Mizorama hmang ve lo tura sawrkarin na taka hma a lak ngei PC Party chuan kan beisei tlat a. PC Party chuan Kan Ram, Kan Hnam leh Kan Sakhua himna tur kan ngai pawimawh hle a, hengte laka kan dinhmun a derthawn theihna thil eng pawh thleng se theih tawpa hma lak zel kan tum a ni,” a ti bawk.
