Tipa-ah ZPM Siaha District Headquarters chuan vawiin khan mi thar lawmluhna leh vantlang inkhawm a buatsaih a; He hun hi K Sapdanga, ZPM Working President chuan hmanpuiin mi thar 111 a lawmlut a; heng zingah hian K Siakhai, Ex-MDC leh B.Pheihra, Ex-CEO te an tel. K Sapdanga hi Lalchhuanthanga, MLA; General Secretaries – Lalmuanpuia Punte leh Saithuama te, General Headquarters hruaitu dangten an tawiawm a ni.
Mi thar lawmluh paha thusawitu K Sapdanga chuan, “Siaha district-a ZPM meichher chhi nungtu, hun khirhkhan tak karah pawh khawhar tak leh mittui senga lo kaihruaitute zahna chibai kan buk a. Chumi hnuah Mara district mipuite hriathlawh, kan mi awh tak takte ZPM-ah an lo kal zel a; kan hruaitu hlui ten hlim taka mawhphurhna an hlan thei kha a ropui kan ti. Kan hruaitu lo ni thin leh hruaitu tharte kan chhuang em em a, Zoram meichher ni turin chhimlam atangin kan hliau alh tawh a, thlipuiin kan chhem alh zual mek a ni. Chuvangin, tun hun kan hman mek hi hun chhinchhiah tlak tak a ni. Mara thalaite hi kawng hrang hrangah hmahruaitu an ni thei tih result-in min hrilh a, MPSC result hmatawngah Mara thalaite hming kan hmu fo a, a chhuanawm pawl kan ni zel. Nakin lawka thutlukna pawimawh, sawrkar khalhngiltu tur leh khaidingtu tur an ni dawn; Mara thalaite theihna hi Mizoram theihna a ni a, Mizoram hmathlir hi Mara thalaite hmathlir a ni,” a ti.
K.Sapdanga chuan, “Ram leilung hausaknaah chhimbial a tha em em a, agriculture hmalakna atan hmun tha tak tak a awm a, undivided chhimtuipui district hi Mizoram eibar innghahna a ni thei tih a chiang a ni. Amaherawhchu, he hmun tha tak hi kan sawrkar kal tawh ten an hawisan rei lutuk a, awmze neiin an buatsaih hleithei lo a, ZPM chuan hei hi mak kan ti a, keini chuan he lunghlu tla hlang hi chhar ngei kan tum a ni,” a ti a. Mizoramin hydro electric potential a neih len ber chu Kolodyne project a ni, mi thiamten tha an ti si a, mahse sawrkar kal tawh tawh ten an chhunzawm hleithei lo. Project te tak te an tuipui a, an mi leh sa ten an chhawr vang a ni mai; a chhunzawmtu lar ber chu ACB an ni thung. Chhit theiha bar a awm lo a, a siamna bill tang a awm lo thung. Tuirial lah NEEPCO kutah kumkhua atan kan lo pe daih a, ba thangah kan in awk lui ta nih hi. Chuvangin, chhimbial hawisan hrim hrim sawrkar hi i bye bye ve tawh ang u. A rem lo chung chunga Kolodyne project kalpui tum a tha kan ti a ni lo a, mahse thil tha hawisan hi sual a ni,” a ti.
ZPM Working President chuan, “MADC inthlanah khan candidate kan neihlohna hmunah pawh thahnemngai takin kan campaign a, nakkum atan kan inbuatsaih bakah ram tha tak tak te hi a hmunah chian kan duh vang a ni bawk. Kum 2023 inthlan atan political party-te kan inbuatsaih a, keini aia inbuatsaih ngawrh chu neutral mipuite an ni. Tun ang reng rengin neutral mipuite an la phur ngai lo; engatinge kan tih chuan, kan sawrkar hrawn mek hi zan thim hnuaia mangchhe mang mangang ang mai a ni,” a ti.
