MNF sorkarin sum leh pai a enkawl thiam loh luat avangin Mizoramin harsatna kan tawk mek a, hemi siamtha tur hian Mizoram hian sum enkawl thiam leh hlemhletna laka fihlim Pu Lalsawta a mamawh takzet a, enchhin ngai lo Mizoramin a mamawh chief minister kan neih theihnan Mizo mipuiten Congress kan sorkar tir a ngai a ni, John Rotluangliana, PAC member leh ex minister chuan a ti.
Dampa East block a party programme a zinchhuak mek Pu John Rotluangliana chuan: “Kan state budget pharh mek hi vaibelche 14000 vel a ni a, kan leiba zah chu vaibelchhe 13000 vel a ni a, chuti chunga kan chief minister in Mizoram leiba hi ka engto lo a ti chu sum enkawl thiam loh lam pawh a ni lo, Mizo mipuite min zahlohna zawk a ni,” a ti.
“MNF sorkar kalmek hian Mizo mipuite min zahpahna nei miah lovin ro an rel mek a, kum nga dang ro an rel leh chuan Mizoram hi chenna tlak lohah a chhuah mai a hlauhawm a, Mizoram mipuiten an enchhin tawh, Mizoram chhunga hmasawnna ruhrel zaa 80 zet hnutchhiah theitu Congress lo chu innghahba tlak party a awm lo,” Pu John Rotluangliana chuan a ti.
MNF kaihhruai sorkar chu kil tinah a hlawhchham a ni tiin an beidawngin Assembly House ah pawh dawt an sawi hreh tawh lo a ni, Pu John Rotluangliana chuan a ti a. “Assembly House a kan thusawite hi ziaka chhinchhiah vek a ni a, thangtharten an la haichhuak dawn a, nakin hunah kan thlarau anchhia an lawh ang tih a hlauhawm,” Pu John Rotluangliana chuan a ti.
“ZPM ten Mizorama sorkar lo awm tawhten engmah thawk lo anga an sawi hi chu thu dik lo hulhual, awmlo atanga lo awm ve, tam in ti ringawt thu vuakthluk mai a ni,” Pu John-a chuan a ti.
“Tawngkam chhe tak tak hmanga party dangte beih hi ram siamna emaw, kalphung thar lantirnana thil tha lo tak a ni a, piangthar hlimin kohhran upa te an hmu ro viau ang lek a ni,” Pu John-a chuan a ti.
“Vawi khat pawh la in candidate lote’n kalphung thar an han ti hi thil nihphung a ni lo. Kalphung thar nei tur chuan kalphung lo neih ve tawh a ngai. Kan sorkar laia kan lo tih loh tih tur kan hre tawh a, kan tih loh tur kan tihte kan hre tawh bawk a, keini party Congress hi kalphung nei tawh, kan kalphung neih tawh siamthatna hre tawhte hi kalphung thar siam thei kan ni,” Pu John Rotluangliana chuan a ti bawk.
Dampa bialtu MLA social media lama ZPM party worker te’n an diriam lutuk dan chu pawi a tih thu Pu John Rotluangliana chuan a sawi a. “Politics ah chuan ka inbei thin, mahse tawngkam chhe lutuk, mimal indiriamna nasa lutuk inbeih hi ZPM te lo awm hnua lo chhuak a ni a, a pawi ka ti hle a, hming lem dukdaklo tak taka Dampa bial MLA ZPM ten social media lama an bei hi thil chin zui tlak loh tak a ni,” Pu John-a chuan a ti.
MPCC Campaign Committee-in zinchhuah programme a duan anga Dampa East block huamah hian John Rotluangliana, Sangzuala Hmar, chairman, MPCC social media deptt., Hriata Chhangtea, vice chairman, vigilance deptt., PC Vanlaruatkima, Gen. secy. ADCC te an tel a ni.
