Mizoramin sum enkawl thiam ram hruaitu a mamawh : MPCC

“Kum 2018-a MNF a sorkar hlim khan Mizoram sorkar sum leh pai dinhmun a tha hle a, leiba a tlemin, bill pek theih loh a awm lo a, hmasawnna hnathawhna tur pawisa vaibelchhe tam tak Congress sorkar khan a hnutchhiah hial a ni. Hei hi Congress sorkar liam tain Finance Minister Pu Lalsawta enkawlna hnuaia ram sum leh pai dinhmun nasa taka an siamthat vang a ni,” tiin MPCC chuan thuchhuah a siam.
Thuchhuahah chuan, “Kum 2018 December atangin MNF an sorkar a, Chief Minister Pu Zoramthanga’n Finance a chang nghal chat a, a tlaran zawng hlira an chet chhoh tak avangin Mizoram sum leh pai dinhmunin hniam lam a pan zel a. State khat chhungkaw Pa ber, Chief Minister in sum tam zia sawi reng chunga a duhsak zawngte vur nana mipui sum a hman hiau hiau avangin tunhnaia CSS sum release hnu atang khan eng bill mah Treasury-ah pass theih a ni tawh lova, Mizoram sum leh pai chu ICU-ah a awm phah ta a ni. Hetih lai hian Mizoramin sum leh paia harsatna nasa tak a tawk mek tih hi Finance Minister ber hian a la hre lo niin a lang a, siamthat tuma a chetna emaw, kan dinhmun dik tak sawifiahna emaw engmah a la nei miah lo a ni.
“Pu Zoramthanga’n Finance Dept a enkawl hnu hian Mizoram sum leh pai dinhmun hi a chhe chak hle a. Sorkar hnathawkte hlawh an puksak a, a hun takah sorkar hnathawk nghet te’n hlawh an la thei ngai tawh lova, a nghet lova thawkte pawhin July 26,2022 thengin hlawh an la dawng thei lo bawk. Sorkar hnathawkte GPF hrensak an ni a, pension te’n pawisa chhuahpui tur rei tak an nghah a ngai a, Contractor bill cheng vaibelchhe tam tak an pe thei lova, Health Care bill la thei lovin kum 2 vel zet kan awm ta bawk. Hetiang hi thil awmdan a nih mek laiin Pu Zoramthanga lainate leh a thurualpui Contractor-te chuan harsatna an tawk ve miah lo thung. COVID-19 an chhuanlam a, mahse, a nihna takah chuan COVID-19 avang khan Mizoram sorkar hian a hmuh ngai loh pawisa vaibelchhe tam tak a hmuh belh zawk a ni. India ram state zawng zawngin COVID-19 kan hmachhawn a, Mizoram ang em em a talbuai zui an awm lo.
“Congress sorkar liamta khan theihtawp chhuahin Mizoram sum leh pai dinhmun kan siam tha a. Kum 2015-2016 atangin kan sum dinhmun pawh a hrisel chho tan a, Surplus Budget (Revenue Surplus) hial kan nei thei ta a. A san lai ber kum 2018-2019 phei kha chuan leiba neih belh miah loin, puk belh miah loin, hma thar lakna tur kha cheng vbch 2500 chuang kan nei a ni. Revenue Surplus hi MNF sorkar hnu kum 2019-2020 atangin a tlahniam nghal thung.
Tunah chuan kan leiba rulhna tura hmun dang atanga sum puk hial a lo ngai chho ta a, leiba thang (debt trap) ah kan tang chho mek a ni. Tunah hi chuan Sri Lanka dinhmun aia kan dinhmun a that bikna tur a awm lo. Switzerland of the East a siam min tiamtute khan Sri Lanka of the East min thlenpui ta zawk a ni. Mizoram mipuite tawrhna hi a nasa hle dawn a, kan thinrim dawn nge, kan la nui hluah hluah zel dawn? tih hi kan inzawh a hun tawh a ni.
“Congress Party hnapui ber tur pakhat chu MNF sorkarna hnuaia Mizoram sum leh pai dinhmun chhe lutuk siam that hi a ni. Chutiang tur chuan Mizoram sum leh pai dinhmun siamthatu Pu Lalsawta hoin theihtawp kan chhuah dawn a ni. Ram sum leh pai dinhmun siamthat hi Mizoram in a mamawh ber rih a ni,” an ti bawk.