July 2, 2022: MJA Gen.Hqrs bultumin Aizawla journalist-te chuan vawiin khan NHIDCL-in Aizawl leh Keifang inkara National Highway kawngpui laih leh siam mekte kan enfiah.
NHIDCL website-a a lan danin, Aizawl to Seling NH54 hi Gawar Pvt Ltd leh SCCPL ten joint venture-a an thawh a ni a, July 25, 2023-a siam zawh tur a ni. NH-6 kawngpui, Seling – Keifang chu GVV Constructions leh NG Projects ten chan insema an siam a ni a, zawh hun tura ruahman chu January 7, 2022 niin, a hunah an siam zo hman lo a ni.
Kawng laih entu MJA member-te chuan hmun hrang hrangah kawng laihna leivung tam tak a paihna hmun (spoil bank)-a paih loin kawng thlangah an hnawl thla ngei tih kan hmu a, leivung paih lai ngei pawh kan hmu a ni. Hmun tam takah kawng thlanga leivung paihin lui tê a hnawh nasa tih te, leivung paih hian thing leh mau a tihchhiat nasat bakah, luia nungchate tan thil pawi tak a thlen ngei tihte kan hmu bawk.
Kawngpui siam entu MJA member-te hi Saitual DC VL Hruaizela nen DC Conference Hall-an kan inkawm a. Saitual DC chuan, kawngpui siam endiktu tur Highway Monitoring Committee an din tawh thu te, kawng siamtute hnenah hriattirna vawi eng emaw zat an pek tawh thu leh an hna thawh lai an tihtawpsak thin thu te, chutih rualin an endik reng theih loh thu te, an hnate a tul anga an endik thu te, kawng an laih dan hrim hrimah dik lo a tam thu te, NHIDCL-in an hnuaia contractor-te an control loh thu te, an leivung paihin a thlang lama sangha dil leh luite a khawih chhe nasat thu te, mipui atangin complaint a tam thu te, lei laih vanga leiminah mi pahnih an thih tawh thute a sawi.
MJA Gen. Hqrs. chuan NH kawngpui enkawltu leh siamtu NHIDCL leh an hnuaia kawng siamtu company-te chu kan rama nungcha te, thing leh maute’n kawngpui siam an tawrh lutuk loh nan leivung paih dan uluk zawkin kalpui se, a paihna hmun tura siamah ngai paih se kan duh a. A tul anga spoil bank siam belh tur te, spoil bank chu tha taka dâwl tur te, spoil bank-ah chauh leivung paih tawh turtein kan duh a, kan beisei a ni. Mizoram sorkar pawh thuneihna a neih chinah tun aia chîk zawka enpui tur leh vil turin kan beisei bawk.
NH kawngpui siam mek ennaah hian MJA Gen. Hqrs. vice president Lalremsiama hoin Aizawla journalist 17 an kal a, Saituala MJA member ten an lo tawiawm a ni.
