MJA General Headquarters, Aizawl chuan vawiin December 22, 2022 (Ningani) hian MJA Charity Fund-a sum thawh khawmte Civil Hospital, Aizawl Poor Fund leh Together in Christ home, Melthum hnenah a hlân.
Civil Hospital, Aizawl (CHA) Poor Fund-a MJA Charity Fund sum inhlanna hi Medical Superintendent pisaah neih a ni a; MJA President Pu C Lalrambuatsaiha’n CHA Medical Superintendent Dr Zoramthanga a awm loh avanga a mawhphurhna la mektu Dr Lalchhuankimi, deputy medical superintendent hnenah Rs 50,000 a hlan a ni.
MJA President chuan, CHA chu MJA member-te duhsaktu a nih thu leh MJA pawhin an theih ang angin an duhsak ve thin thu a sawi a, “MJA Charity Fund hi kum tin member-te’n thawh khawmin mite tanpui nan kan hmang ve thin. Civil Hospital hi mi chi tin pan khawm, mi rethei ber berte pawhin an pan khawm a ni a, chutih lai chuan thawktute hian mi rethei tak tak, damdawi-in pantute tan mahni sumte in séng nasa thin kan hria. Eng emaw talah tangkaia in lo hman turin Charity Fund kan rawn pe ve a, pe tam thei lo mah ila, kan ngaih pawimawhzia kan rawn lantir a ni,” a ti.
CHA Deputy Medical Superintendent Dr Lalchhuankimi chuan, Civil Hospital Poor Fund-ah MJA-in charity fund an pe chu an lawm tak zet thu sawiin, “In thil rawn pek hi a hlu em em a, a tul leh mamawhtute hnenah a thleng vek dawn a, tangkai taka hman a ni ang. Keini hi Mizoram pumpuiin an pan khawm kan ni a, rethei tê tê pawh an tam a, tanpui mamawhtu an tam a ni,” a ti. MJA member-te nen tha taka an thawhho zel a beisei thu sawiin, Civil Hospital that tâwk lohnaah te, an famkim lohnaahte finchhuah zel turin a sáwm a ni.
CHA Deputy Medical Superintendent chuan, Krismas leh kumthar hunpuiah emergency a tam duh tih sawiin, “Chetsualnate a thleng duh a, chu’ng atan chuan kan inring lâwk a, kan phâk tâwkah theihtawpin kan inbuatsaih a, thawktu duty tur kan kan indah belh nual a ni,” a ti.
CHA Nursing Superintendent pawhin Poor Fund an hman dan tlangpui a sawi a; Covid-19 léng avangin Poor Fund an hmu tlem a, chutih laiin, hman chhuah a tam hle tih sawiin, “Poor Fund hi kan dawng ve nual a, tunah Covid a reh a, rawn thawhtu an pung ve leh hret a, kan lawm hle. Poor Fund-a sum lutte hi fimkhur taka hman thin a ni,” a ti.
MJA Gen.Hqrs hian kum eng emaw ti kal ta atang khan mi harsa zawkte tanpuina atan kum tin Krismas dawnah Charity Fund siamin, MJA member-te’n pawisa an thawh khawm thin. Kuminah hian mi/pawl 99-in pawisa an thawh a, Rs 86,965 an thawh khawm a ni. Sum thawhtu zingah MJA member-te bakah, MJA member la ni lo journalist dang te, MLA/Minister thenkhat leh MJA duhsaktu mimal/leh pawlte an tel.
Charity Fund thawh khawm atangin MJA chuan CHA Poor Fund-ah Rs 50,000 leh Together in Christ hnenah Rs 20,000 a hlân a; a la bâng chu a remchan angin mi tanpuina atan a la hlân leh dawn a ni.
