Prof. VP Sati, Department of Geography & Resource Management, Mizoram University lehkhabu ziah, ‘MIZORAM Land and People’ tih chu vawiin April 18, 2022 (Thawhtanni) chhun dar 12 khan MJA Gen.Hqrs. President Pu C. Lalrambuatsaiha’n Aizawl Press Club-ah a tlangzarh.
Lehkhabu tlangzarhna inkhawm hi Prof. P. Rinawma, Head of Department, Geography & RM, MZU chuan a kaihruai a; Dr. K.C. Lalmalsawmzauva, Assistant Professor, Dept. of Geography & RM, MZU-in lehkhabu nihphung tlangpui a sawifiah.
Lehkhabu tlangzarhtu Pu C. Lalrambuatsaiha, President, MJA chuan, geography lehkhabu a tam loh avangin Mizoram – Land and People tih chu lehkhabu hlu tak, Mizoram tan leh a bik takin Geography subject tana méllung pawimawh tak a nih thu a sawi a, “Mizote ziak leh chhiar thiam lamah kan sang a, lehkhabu pawh a tam hle. Chutih rualin, lehkhabu chhiar lam kan tui ta chiah lo nge, tan kan lâk thar a tul hle a ni,” a ti.
MJA President chuan, lehkhabuah Mizoram leilung leh environment chungchang, Mizote hnam nunphung leh lo neih dan te, ranvulh lam thlenga tarlan a nih thu sawiin, “Lehkhabu hi a lian vak lo a, mahse, college leh university zirlaite tan chuan tangkai tak a ni ngei ang. Mizoram tan chuan a hlu em em a ni,” a ti a; chutih rualin, lehkhabu man (printed price) chu Rs 2,495 lai a nih avangin mi nawlpui tan lei vek a har mai theih thu a sawi.
Mizoram – Land and People tih lehkhabu-ah hian chapter 13 a awm a, phek 143 a ni a; a ziaktu Prof. VP Sati pawhin tlangzarhnaah hian thu a sawi.
Prof. VP Sati hi doctorate a neih bakah D.Litt. a ni a, MZU faculty zinga a tel hmain Eriterea Institute of Technology (Africa)-ah a thawk tawh a, Institute of Mountain Hazards and Environment, Chengdu, China-ah te, Madhya Pradesh sorkarah te, Garwal University, Srinagar-ahte a thawk tawh bawk. Seminar leh paper present in ram 36 vel a tlawh tawh a, research paper 150 vel a chhuah tawh a ni.
