Madhup Vyas, IAS Chief Electoral Officer, Mizoram chuan vawiin khan ICT Conference Hall-a General Mizoram Legislative Assembly, 2023 inthlanpui loawm tur chungchangah chanchinthar lakhawmtute a kawm a. Lunglei South biala Meriam L Hrangchal Congress party-in an candidate chungchanga chanchinthar lakhawmtute zawhna chhangin CEO chuan, “A pasalin scheduled tribe certifcate a nei a, dan ang thlapin candidate a ti thei,” tih sawiin, customary law chungchangah chuan Election Department chuan sawi theih an neih loh thu a sawi.
Madhup Vyas chuan, “Election Commission of India thuchhuah hrang hrangte bawhzuiin Chief Electoral Officer, Mizoram chuan General Election to Mizoram Legislative Assembly, 2023 atana tul hrang hrangte chu Commission duh danin a bawhzui zel a ni,” a ti.
Final Electoral Roll-in a tarlan danin Mizoram pumah mipa voter 4,13,062 awmin, hmeichhe voter 4,39,026 an awm a. Service voter 4,975 awm bawkin Mizoram puma vote nei zat chu 8,57,063 an ni a. Vote thlakna tur Polling Station 1,276 te ECI hriattir tawh a ni a, District Election Officer-te chu Commission thuchhuah angin Candidate inhnuhdawh tawp ni atanga ni 3 chhungin Contesting Candidate-te hriattir vek hman tura tih an ni a. DEO tin ten Polling Station mamawh Assured Minimum Facilities (AMF) siam hna kalpuiin, Persons with Disability (PwD) ten Polling Station an thlen theihna turin ruahmanna an siam bawk.
Tun dinhmunah inthlan duty tur indaih lohna a awm lo a. Polling Station 1,276 zinga 765 ahte vote thlak lai
webcasting ti tura ruahmanna siam a ni a. Hei hian Mizorama Polling Station awm zinga 60% a tling pha a ni. Multi Computer Services, West Bengal-te’n he hna hi an thawk dawn a, tul angte buaipui fel niin, 27.10.2023 atangin hna an thawk tan ang.
EVMS/VVPAT-te hi District tina Strong Room-ahte venhimna khauh tak Armed Security Force leh CCTV hmanga ven reng a ni. Control Unit atana hman tur Ballot paper-te ECI inkaihhruaina angin Government Press-ah chhut fel tawh a ni a. District zawng zawngin 25.10.2023 khan CEO Office atangin an la fel tawh a ni.
Postal ballot hmanga vote thlak thei category 4 awmin, kum 80 chunglam, vohbik (PwD) benchmark disability certificate nei te, vote thlak nia Essential Services hrang hrang duty leh inthlan buaipuia duty-te an ni a. RO theuhte’n dilna form pe chhuakin dilna engemawzat a lut tawh a ni a. Service voter 4,975 te tan Electronically Transmitted Postal Ballot Management System (ETPBMS) kaltlangin e-Postal Ballot thawn chhuah fel a ni.
Mizorama Assembly Constituency 40 ah in lama vote thlak ‘home voting’ thei turin kum 80 chung lam leh Vohbik, an vaiin mi 2,092 an awm a. ECI-in a ruat Expenditure Observer kaihhruaina hnuaiah inthlan senso ngaihventu expenditure monitoring team chu assembly constituency tinah siam a ni a. Enforcement Agency-te pawhin theihtawp an chhuah bawk a. An thil man dan kimchang chu Nodal Department atangin ni tin dawn thin a ni.
Inthlan puan ni 9.10.2023 atanga an thil mante chu a hnuai a mi ang hi a ni tawh a ni.
State pumah Model Code of Conduct khauh taka kenkawh a ni a. Sawrkar hmalakna bikah Department kaihhnawihte’n Chief Secretary kaihhruai Model Code of Conduct Screening Committee-ah dilna an thlen zel a, hemi piah lamah hian Commission ngaihtuah zui tura thlen pahnih khat a awm bawk.
Contesting Candidate 174 ten seat 40 an chuh dawn a ni.
Supreme Court thupek angin Commission chuan Parliament leh State Legislative Assembly-a Contesting Candidate criminal case nei, thiam loh chantir tawh emaw, case kal mek neite chu Criminal Antecedent
an neih dan vantlang hriata tarlang turin a ti a.
Candidate zinga an record chhuah tawhte chu a hnuai a mi ang hi a ni.
Vote thlak hma ni leh vote thlak nia Offical-ten report an thawn zung zungna turin POLLSTAR app chu tha bera hriat niin hman tum a ni a. Tin, State Police personnel 3,000 bakah Central Armed Police Forces (CAPF) section 450 rawih tura ruahman atangin BSF Company 10, CRPF Company 5 leh SSB Company 5 ten Mizoram an lo thleng tawh bawk.
Vote thlak nia hman theih turin Pawan Hans Helicopter pakhat Mualpui Helipad-ah zing dar 7 atanga tlai dar 4 thleng duty tura ruahman a ni.
CEO Mizoram chuan inthlanna felfai, dik, muanawm, mi tin huapzo leh tel vek theihna hlimawm tak neih a nih theih nan, inthlan kaihhnawiha che vel zawng zawngte, a bik takin Media mi leh sate tawiawmna a ngen a ni.
